• USD 468.56

  • EUR 497.56

  • RUB 7.3

  • CNY 67.18

15 Maýsym, 19:51:36
Almaty
+35°

12 Aqpan, 2024 Áleýmet

О́rtengen, tonalǵan «Aqshyń». «Bir býtıktiń quny pátermen teń»

Semeıdiń qaq ortasyndaǵy iri saýda ortalyǵy bir túnde «joq» boldy. 6 aqpanda túngi eki jarymda tutanǵan otpen 200-ge jýyq órt sóndirýshi 20 saǵat alysty: túske taman áreń degende aýyzdyqtalǵan alapat órt tek keshki 21-00-de tolyqtaı sóndirildi. Sapaly ári brend dúnıe izdegende semeılikter bas suǵatyn saltanatty nysannyń osylaısha talqany (80%) shyqty, taýary kúl bolǵan 2 myń saýdager bir demde jumyssyz qaldy.

Abaı oblysy ákimdigi

Sýyt habardy estip, bastapqyda saýda ornyna qaraı júgirgen saýdagerlerdi 300-ge jýyq polıseı kútip aldy. Olardy órt kezinde de, órtten keıin de oqıǵa ornyna jibermedi. Al saý qalǵan taýarlardyń ózi urlanǵany da aıtylady. Osylaısha Abaı oblysynda 2 myń adam bir túnde narazylyq bildirýshiler qatarynan bir-aq shyqty. О́ıtpeske amal bar ma? Bul arada bılik tek eki nárseni ýáde etip otyr: nesıesi bar saýdagerlerdiń aı saıynǵy tólem merzimin jarty jylǵa shegertip berý jáne ózderin jumyssyz retinde tirkep, memleketten járdemaqy tóleý. Muny QR premer-mınıstriniń orynbasary Tamara Dúısenova málimdedi. Al saýda ortalyǵy jergilikti depýtat Marat Qurmanbaıǵa tıesili bolyp shyqty. Ol ózin de japa shegýshi dep sanaıdy. Onyń pikirinshe, ǵımaratyna qaskóıler ot qoıýy yqtımal.

«2023 jyly qazan aıynda órt sóndirýshiler kelip tekserip, óz usynystary men talaptaryn alǵa tartty. Jańa jylǵa deıin biz ol talaptardy oryndaǵanbyz. Sondyqtan bul jaǵynan másele bolmaýy kerek. Negizi, men 50 mlrd teńge jumsaǵanmyn bul bızneske. Qazir bankter aldynda meniń 50 mln teńge bereshek nesıem bar. Men bıznesimdi saqtandyrǵan joqpyn», - depti Marat Qurmanbaı jergilikti telearnaǵa bergen suqbatynda.

Ol tek aqpan aıyna jaldaý ornyna tólegen saýdagerlerdiń aqshasyn keri qaıtaratynyn aıtty.

Osylaısha shyǵynnyń eshkim ótemesine kózi jetken qaýym BAQ aldynda bir-birlep shyǵyp, ashy shyndyqty aıta bastady:

«Saýda ortalyǵynyń qojaıyny taýarymnyń barlyq shyǵynyn óndirip bersin. Barlyǵymyzdyń talabymyz osy! Sebebi onyń aıtqanyna osy kúnge deıin barlyǵymyz kónip, degenin istep keldik. Ondaǵy bir býtıktiń baǵasy bir páterdiń qunyna teń. Sony da satyp aldyq qoı. Bir aıdyń jaldaý qunyn tólemediń be, adam qurly kórmeıdi, qýyp shyǵady ol aradan. О́ndirsin endi!», deıdi saýdagerlerdiń biri ashyna.

«Eshqandaı shyǵyndy óndirý, ótemaqy degen bolmaıdy» dep bizdiń betimizge aıtty. О́ıtkeni «Aqshyn» - jekemenshik korporasııa eken de, al saýdagerler jeke tulǵa eken. Sonda qalaı? Jeke tulǵa – el azamattary emes pe? Bul tragedııa emes pe?..», deıdi Anar esimdi saýdager.

«Jalǵyzbasty áıelmin. Moınymda nesıe bar. Áıelderdiń kıim-keshegin satatynmyn. 15 mln teńgeniń zaty bar bolǵan ol arada. Bári órtenip ketti. Endi qalaı ómir súremin, bilmeımin», deıdi Olesıa.

«Qoıma men sórede turǵan 410 mln teńgeniń taýary joǵalǵan.  Altyn salatyn jáshikterdiń ishinde bári kúl bolyp ketken. Ystyq kúldi eleýishpen eleý múmkin bolmady. Sondyqtan altyn satatyndardyń bárine ony kúrekpen salyp, ishki ister basqarmasyna qoıyp qoıatyndaryn aıtty», deıdi baǵaly áshekeı satýshy Aqmaral.

«Altyn buıymdarym ornynda joq. Seıf órtenbegen, al onyń ishindegi altyn buıymdar joq. Tipti, temirdiń qyzýymen órtengen jaǵdaıda ornynda balqyp jatýy kerek qoı. Onyń tuqyly da kórinbeıdi. Ákim myrza, meniń zatym órtengen joq, urlanyp ketken, buǵan kim jaýap beredi?», dedi arnaıy ótkizilgen jıynda saýdagerdiń biri.

О́z kezeginde oblys ákimi Nurlan Uranhaev bul másele polısııa quziretine jatatynyn aıtty.

Al polısııa bul arada tek bir bap – órt qaýipsizdigin saqtamaý boıynsha is qozǵaǵany, ázirge belgili. Úkimet bolsa, másele bizdiń nazarymyzda degennen ary asa almaýda. О́rtengen, tonalǵan «Aqshyń» saýdagerleri báribir úmit úzbeı, kez kelgen taraptan kómek kútýde... 

Qamshyger

Avtormen onyń Facebook paraqshasy arqyly habarlasýǵa bolady.

Jazylyńyz

"Qamshy" silteıdi

Qate tapsańyz, qajetti bólikti tańdap ctrl+enter basyńyz.

Pikir qaldyrý

pikir