Prorýbke túsip, qazaq kim bola almaı júr?

Qazaqtardyń orystyń «kreshenıe» merekesine qatysyp jatqan vıdeolary tarady taǵy da áleýmettik jelilerde.

Bireý úsh ret «Allahý akbaryn» aıtyp súńgip shyqty.

«Búgin «kreshenıeni» toılatyp, erteń juma namazyna baramyz» dep qoıady taǵy biri. Orystar ań-tań. Qazekeńderdiń ózderimen jaǵalasyp shoqynyp júrgenderin qoldaıtyndar da bar. Muzdaı sýǵa túsý paıdaly-mys deıdi.

Qoǵam belsendisi Jánibek Qojabaı qysta muzdaı sýǵa súńgýdi aqymaqtyq sanaıdy.

– Qazir ózi dindegilerde es joq, eshteńeniń baıbyna bara bermeıdi. Iısýs qandaı sýǵa túsip edi, soǵan keleıik. Ol Taıaý Shyǵystaǵy eshqashan muz qatpaıtyn Iordan ózenine túsýshi edi. Bul ózen tórt memleketti kesip ótedi: Sırııa, Lıvan, Palestına, Izraıl. Al endi osy elderdegi ortasha aýa raıy +20 gradýstyń mańaıy. Bylaısha aıtqanda, bizdegi mamyr, qyrkúıek aılarynyń aýa raıy. Eger Iısýs Qıyr Shyǵysta, Sibirde, ne Astana mańaıynda ómir súrgende -30 gradýs aıazda ózenniń muzyn oıyp sýǵa túserine kúmandanamyn. Keıbir pravoslavııalyq shirkeý basshylary dál bulaı muz astyndaǵy sýǵa túsýdiń qajet emestigin eskertedi.

Endi sol sýyq sýǵa túsip júrgen qazaqtarǵa kelsek, densaýlyq úshin túsemiz deıdi. Densaýlyq úshin dese, Qudaıdyń basqa kúnderi de jetip jatyr ǵoı?! Sosyn ondaı áreketke kemi 1 jyl daıyndalý kerek. Jylydan bastap aqyryn-aqyryn kúndelikti shomylatyn sýyńdy salqyndatyp, organızmińdi sýyqqa úıretip alý qajet. Al jyly sýǵa jýynyp júrip, muzdy sýǵa kúmp etseń, búkil músheń, mıyń, júregiń, búıregiń, baýyryń muz astynda shok alady. Baıqamasań, júregiń toqtap qalýy da múmkin.

Jalpy, boı úırensin-úırenbesin muz astyndaǵy sýǵa túsý essizdik qoı. Densaýlyq kerek bolsa, salqyn dýsh qabyldaýdy ádetke aınaldyrý kerek, – deıdi ol.

Ras-aý, qazirgi qazaqty eshkim májbúrlemese de óz erkimen shoqynǵany qyzyq eken.