Halyq banki halyqtyń qalaýyn qashan tabady?

Elimizdegi eń iri bankterdiń biri Halyq bank. Jurttyń kóbi zeınetaqysyn, jórgekpul, járdemaqy sekildi memlekettik tólemderdi tek osy bank arqyly alady.

Sodan ba eken, tap bir memlekettik mekeme sekildi isi túsip kelgen halyqqa jóndep qyzmet kórsetpeıtin jaman ádetinen áli aryla almaı keledi.

Máselen, memlekettik emhanalar kózimen súzip alardaı «Nege keldiń?» degen syńaımen qarsy alsa, jekemenshik emhananyń ár klıentine asty-ústine túsip qyzmet etetini ras.

– Halyq banktiń menedjerleri de susty. Sálem-saýqat joq. Adamdarǵa emes, aıýandarǵa qyzmet etip jatqandaı. Esepshotty mobıldi qosymshasynan ashýǵa bolady. Biraq ol istemeı tur. Oryssha mátin shyǵady. Almatydaǵy ál-Farabı 34-tegi keńsesine soqtym. Úlken zal. Adam joq. Talon aldym. Bes mınýttaı kúttim. Menedjerler bos júr. Biri qolyna krýjka ustap, árli-berli júrdi. Biri shamasymen ájethanaǵa baryp-kelip júr. Klıentke jyldam qyzmet kórsetýdiń ornyna bank qyzmetkerleri bir-birine siltep, dóreki sóıleıdi, dep jýrnalıst Shyńǵys Muqan úsh kún boıy onlaın da, oflaın da esepshot asha almaı, qınalyp júrgenin ashyna jazdy kúni keshe áleýmettik jelide.

«Halyq bank» emes, halyqqa qarsy, antıhalyq bank bul» degen dıagnoz qoıdy ol osy bankke.

Halyq bankiniń tutynýshylary banktegi qyzmet bylaı tursyn, onyń mobıldi qosymshasyna da shaǵymdanyp jatady.

«Halyqtyń qosymshasy tym túsiniksiz. Ne qaıda tur? Basyń qatady. Salaq qatynnyń búktegen kıimindeı ústi-ústine úıe bergen birdeńe. Onyń janynda Kaspı qazaqtyń ózi sııaqty qarapaıym ǵoı. Mekteptegi balaǵa da túsinikti», degen eken Jaras Alıpbaev esimdi oqyrman.

Aqyr aıaǵy Halyq banktiń qaı qyzmetin paıdalansańyz da, kóbi aqyly. Máselen, bireýge aqsha aýdarsańyz da, bankomattan aqsha shyǵarsańyz da 1 paıyz komıssııa ustaıdy. Bankten bankke aýdarylǵan aqsha tek 3 kúnnen keıin ǵana túsedi deıdi. Eldegi aldyńǵy bank sanalsa da, qyzmetine qatysty syn kóp bop tur ázirge.