Qaıran aqsha! Sý bolyp erip jatyr...

Qazaqstanda jylda jańa jyldyń aldynda ákimder alaqanyn ysqylaı bastaıdy. Qur dyrdýǵa tógiletin mıllıondar, mıllıardtar...

Jańa jylǵa shyrshalar ornatý jyldaǵy úrdis. Kádimgi shyrsha, biraq quny mıllıondarǵa kete beredi.

Bıyl óńir ákimdikteri jańa jyl toıyna arnap shyrshalardy qanshaǵa ornatty? Atyraý qalasy ónerpazdar men otshashýdyń shyǵynyn qospaǵanda, shyrshany bezendirýge jergilikti bıýdjetten 19 mıllıon teńge bólgen.

Almaty qalasynda shamamen jarty mlrd teńge jumsalǵan. Qyzylorda oblysynda shyrshaǵa qansha qarjy bólingenin naqty bilmedik, biraq olardyń shyrshasy kóp uzamaı symdardyń tuıyqtalýynan janyp ketkenin bildik.

Ásirese qatty masqara bolǵany – Pavlodar qalasynyń ákimdigi. Ondaǵylar bıyl shyrsha ǵana emes, muz qalashyq salamyz dep sheshipti. Álgi muz qalashyqqa bıýdjet qarajatynan 53 mıllıon teńge jumsalǵan. Biraq aýa raıy +3 gradýsqa deıin kúrt jylyp, muz qalashyq sý bolyp, dúıim Qazaqstannyń kóz aldynda erip jatyr. Jańa jylǵa jetpeı.

Qala ákimi Hasar Habylbekov muz qalashyqty salmastan buryn zııaly qaýymmen aqyldasqan desedi. Alaıda onyń 52 mıllıonǵa shyrsha, 53 mıllıonǵa muz qalashyq salýyna eshkim kelise qoımaǵan eken. Qyrsyq ákim sonda da óz degenin jasap, paıdasyz dúnıege 105 mıllıondy sarp etken. Árıne, bıýdjet qarjysyna.

«О́ńirde qys erekshe jyly, jańbyrly bolatynyn búkil el estidi. Biraq bir de bir adam qoı demedi. Depýtattar, sizder endi saılaýshylarǵa ne deısizder? Shana bar, syrǵanaq joq. Saýal salar shama bar ma?» degen saýal tastady QR jýrnalıster odaǵynyń Pavlodar oblystyq fılıaly dırektory Bolat Amanbaev.

Jańa jyl merekesin toılama demeıdi eshkim. Biraq jyl saıyn memlekettik sheneýnikter mereke uıymdastyrý men shyrsha satyp alý úshin nege mıllıardtar jumsaıdy? Shyrshany qur sándeýge mıllıondar ketedi, munyń bári memlekettik satyp alýlar arqyly júzege asady. Ákimdikter úshin jańa jyl merekesi bıýdjetti ysyrap qylyp, jemqorlyq táýekelin týdyratyn naýqanǵa aınalyp ketkeni ókinishti. Muny doǵaratyn kez qashan týar eken?