Qazposhta qashan túzeledi?

Budan eki jyl buryn Qazposhtada jumys baıaý júrgiziletin. Sodan beri jaǵdaı ózgerdi me desek, áli sol qalpynda. Basqa qala túgili, Almatydaǵy bólimshelerinde áli ózgeris joq.

Bir zatty basqa qalaǵa salyp jiberý úshin uzyn-sonar kezekti aıtpaǵanda, máselen, №5 bólimshedegi qyzmetshilerdiń dórekiligi bólek taqyryp. Bir kisiniń zatyn Balqash qalasyna salmaq bolyp, ishtegi qyrǵyn kezekke qarap «áı, bir-eki saǵatsyz tirligimiz bitpeıdi-aý» destik. Kassadaǵylardyń tirligi tym baıaý. Kelgen halyqqa aıqaılap, tań atpastan júıkeleri juqaryp otyr. Endi bir jigittiń uzaq kútken kezegi jetken eken, oǵan qyzmetshiler «Tólemdi tek qaǵaz aqshamen ne kartamen ǵana tóleısiz» dedi. Al  tóleý tártibi tek solaı ekeni esh jerde eskertilip, jazylmaǵan.

Odan bólek, gazet-jýrnaldarǵa jazylý, taratý jumystarynda da másele kóp. «Balbulaq» jýrnalynyń qyzmetkeri Raısa Úmbetbaeva Qazposhtanyń qyzmet kórsetýinde kóptegen kemshilikter bar ekenin  aıtady.

– Meniń jumysym poshtamen baılanysty bolǵandyqtan, bólimshege jıi baramyn. Sonda baıqaıtynym, óz isiniń mamany emes bireýler otyrady. Jumyssyz bireýlerdi taýyp ákep, otyrǵyzyp qoıǵandaı. Ne sálemdesýdi bilmeıdi, ne eshteńeni túsindirip aıtpaıdy. Mysaly, men balamdy jýrnalǵa jazdyraıyn desem, ár balanyń óziniń jeke JSN-i qajet deıdi. Al negizi balanyń ata-ájesi, ata-anasy óz JSN-imen men balasy men nemeresiniń atyna jýrnal jazdyrýǵa quqyly emes pe?! Sodan keıin basqa óńirlerge, túrmelerge, armııaǵa jiberetin joldamalarmen barlyq qyzmetti birge aralastyryp jibergen, mundaı nárseler adamnyń ýaqytyn alady. Telefon arqyly tólemge kóshkenimizge kóp boldy, ne onymen, ne kartamen tóleı salaıyn deseń, ádette apparattary jumys istemeı turady,– deıdi ol. 

О́kinishtisi, Qazposhtadaı mekemede kóptegen kemshilikterdiń oryn alýyna aılyqtyń azdyǵy sebep. Úlken oqý bitirgen jastardyń basqa basqa, Qazposhtaǵa bara qoımasy anyq. Kelgen kúnniń ózinde mundaı mekemeden jemqorlyq shemalaryn izdeıdi. Qazposhtada ótken aıda ǵana 273 mln teńge jymqyrylyp, aımaqtardaǵy 7 fılıalyna qatysty 11 qylmystyq is ashylǵan. Sóıtsek, Qazposhta qyzmetkerleri ústeme aqylar alyp, halyqtyń qaltasyn qarmap kelgen eken.