Memleketti jeý degen osy. Satasyń, sosyn jalǵa alasyń

2017 jyly Shymkenttegi iri nysan sanalatyn muz aıdyny 128 mln teńgege satylyp ketken. Qala ákimdiginiń baspasóz qyzmeti sol kezde muz saraıyn «MunaıQurylysServıs» JShS-i satyp alǵanyn habarlaǵan. Bul kompanııa shymkenttik kásipker, olıgarh Serikjan Seıitjanovqa tıesili.

Aýksıondaǵy bastapqy baǵasy  996 944 000 teńge dep belgilengen muz aıdyny bar-joǵy 128 mln teńgege ótip ketken. Nysannyń satylýyn jergilikti sheneýnikter qarjy tapshylyǵynyń saldarynan kútip-ustap turý múmkin emes dep túsindirgen.

Eń qyzyǵy, jekemenshikke nebári 128 mln teńgege satylyp ketken bul muz aıdynyn ákimdik endi 1 mlrd teńgege jalǵa alǵan. Bul sumdyq qoǵamda qyzý talqyǵa túsip, Shymkent qalasynyń jańa ákimi Ǵabıt Ábdimájıtuly jýrnalısterge bergen jaýabynda: «Qazir quqyq qorǵaý organdary tekserip jatyr, qanshalyqty zańdy, ne zańsyz ekenin qorytyndysy shyqqan soń aıtamyz» deıdi.

Iаǵnı, ákim bul jerde óziniń qatysy joǵyn aıtyp, barlyq másele tek quqyq qorǵaý organdarynyń quzyrynda degen syńaı tanytady.

Endeshe «Ádildik joly» respýblıkalyq qoǵamdyq keńesiniń tóraǵasy Dıdar Smaǵulov bul oqıǵada sybaılas jemqorlyq bolýy múmkin ekenin aıtady.

Ákimdik 2017 jyly Shymkent muz saraıyn jekeniń qolyna ótkizgen. Bul aımaqtaǵy eń úlken sport kesheni, aýmaǵy 6203 sharshy metr. Oǵan qosa ákimshilik ǵımaraty 1810,8 sh.m. Sol kezde bar bolǵany 128 mln teńgege satylǵan. Endi jergilikti olıgarh Seıitjanov ony mıllıard teńgege jýyq aqshaǵa qaıtadan ákimdikke jalǵa berip otyr. Muz saraıynyń 67 paıyz úlesi olıgarh Seıitjanovtiki, 33 paıyzy «Saýtjanov» JShS-ine tıesili. Biraq ol kompanııa da Seıitjanovtiki bolyp shyqty.

Foto: Dıdar Smaǵulov

– Kishkentaı úıdiń baǵasyna úlken sport kesheni. Ákimdik 3 jylda 40 mln teńge kiris ákelgen nysandy ustaýǵa aqsha joqtyǵyn aıtyp shaǵymdanady eken, biraq olıgarhtan muz saraıyn jalǵa alýǵa aqsha tapty. 2017-2023 jyldar aralyǵynda memleket sport keshenin jalǵa alý úshin 1 mlrd teńgeden astam qarjy tólegen. Satyp alý portalynda 1 031 795 386 teńgeni quraıtyn sharttardy taptyq.

Iаǵnı, 128 mıllıonǵa satyp alyńyz da, sodan keıin 7 jyl memleketke jalǵa berińiz. Seıitjanov 360 mln dollar baılyǵymen Forbes reıtınginde 23-shi orynda turǵan Shymkenttegi bedeldi kásipker. Nemeresine Qaırat Satybaldynyń qyzyn ápergen toıda 21 mln teńgeniń tortyn jeıtindeı jóni bar eken. Endi bul olıgarhtyń táýbesine túsip, ǵımaratty kúrdeli jóndeýden ótkizip memleketke qaıtaryp bergeni durys bolar edi, deıdi Danııar Smaǵulov.

Aıtpaqshy, tort týraly áńgimeni jýrnalıst Ulyqbek Úmbet te rastap otyr: 

«Shymkenttegi muz saraıy qalaısha 7 torttyń qunyna satylyp ketti? 7 tort dep otyrǵan sebebim, Renat Agzamov esimdi  kondıterdiń jazýyna qaraǵanda, Seıitjanovtar áýleti nemereleriniń toıyna 3750000 rýblge qazirgi naryqpen 18675000 teńgege tortqa tapsyrys beripti. Muz saraıy 128 mln teńgege satylǵan. 128000000:18675000= 6,8. Muny esepteý úshin ǵulama bolýdyń qajeti joq, tek matematıkanyń tórt amalyn bilseń boldy. Rasymen de «jańa Qazaqstan» qurýdy qolǵa alatyn bolsaq, osy is boıynsha sol kezdegi Shymkent qalasy men Ońtústik Qazaqstan oblysynyń ákimdikterinen jaýap alynýy kerek», deıdi ol.

2023 jyldyń 5 qyrkúıeginde taǵaıyndalǵan Ǵabıt Syzdykbekovke deıin Shymkentte kimder ákim bolǵanyn eske salaıyq:

2015-2017 jyldary jáne 2018-2019 jyldary – Ǵabıdýlla Ábdirahmanov.

2019 jyly – Erlan Aıtahanov.

2020-2023 – Murat Áıtenov.