"Jańa Qazaqstan". Jastardyń quny 1 mln teńge

Taǵy bir qaıǵyly oqıǵa qazaqtyń qabyrǵasyn qaıystyrdy. Qanshama jas qyrshynnan qıylyp, qanshama otbasy qara jamyldy. Obaly kimge? Qaýipsizdikke kóz jumǵan kásipker me, ony qadaǵalamaǵan jergilikti bılik pe?

Almatydaǵy stýdentterdiń jataqhana máselesi – jylda aldymyzdan shyǵatyn másele. Stýdentterdiń saıabaq jaǵalap, kóshede túnep júrgeni talaı BAQ-ta jazyldy. Almatyǵa kelip oqýǵa túsýshiler kóp, biraq jataqhanada oryn joq.

– Oqý orny jataqhana bere almady, balamdy hostel degenge jaıǵastyrdym, amal joq. Aıyna 40 myń teńge tóleımiz. Stýdent 40 myń tóleıdi degen ne sumdyq? Onyń ózinde oryndar tolyp tur, dep shaǵymyn aıtty bir stýdenttiń anasy Alma Tusaýbaeva.

Jataqhananyń azdyǵy men qaladaǵy páterlerdiń qymbattyǵynan jastar hostel jaǵalaıdy. Keshegi órtengen hosteldiń jaǵdaıy tipti sumdyq. Jertóle.

Jertóleni jataqhanaǵa berý zańsyz. Ol Halyq bankke qarasty «Kýsa halyq» JShS-i Ala hostel JShS-ine jalǵa bergen. Bul ǵımarattyń adam turýǵa arnalmaǵanyn, tek zat saqtaıtyn qoımaǵa arnalǵany anyqtaldy. Soǵan qaramastan, ıeleri ol jerden hostel ashyp, adamdardy terezesi joq, aýasy tar jerge turǵyzǵan.

Beıresmı derekterge sensek, Almatyda 253 hostel bar. Baǵalary táýligine 2 myń teńgeden bastalady. 2GIS kartalary Almatynyń hostelderinde qazir nebári 15-18 bos oryn tur deıdi.

Qazaqstannyń ár túkpiri túgili, alys-jaqyn shetelden kelgen jumysshylar men stýdentter jatyr, ne sanıtarlyq talapqa saı emes, ne órt qaýipsizdigi saqtalmaıtyn jerlerde. Biraq bizdiń quzyrly mekemeler ádette tek qaıǵyly oqıǵa oryn alǵanda ǵana qımyldaı bastaıdy.

Bul jaǵdaıda jergilikti bılik kináli. Jaýaptylar jazalanýy tıis. Biraq bizdiń bılik qaıǵynyń bárin aqshamen jýyp-shaıyp úırengen. Jýrnalıst Gúlmıra Ábiqaı jazǵandaı, qaıǵyǵa adamsha qaıǵyrýǵa mursha joq, oqıǵanyń baıybyna baryp, kim kináli ekenin anyqtap, zerdeleýdiń ornyna ólgen adamǵa tólenetin qun týraly aqparatty alǵa shyǵarady.

– 5 bala órtenip ketkende Astananyń ortasynan úı berildi dep basý aıttyq. Keıin bosanypty dep taǵy shýladyq. Bunyń bári 5 perishteniń ornyn basa almaıdy. Aıagózdegi tragedııany endigi umyttyq ta. Onda da 4 balanyń óliminen keıin úı beredi degen aqparat basym boldy. Biraq ol úı áli berilmedi. Aı burynǵy 46 shahterdiń ólimine de 10 jyldyq jalaqy tóleý, nesıe óteý jáne janazalyq ótemaqymen jyly jabylýda. Bul joly da solaı, hosteldegi órtten qaza tapqan óz azamattarymyzdyń týystaryna mıllıon teńgeden bólindi. 1 mıllıon teńge ǵana. Marqum eger almatylyq bolsa, jerleýin uıymdastyramyz, ózge aımaqtan bolsa, denesin týǵan jerine attandyramyz dedi. Qyrshyn ketken jastardyń arasynda 15 jastaǵy kolledj stýdenti bar. 13 jastyń 12-si Almatydaǵy iri 5 oqý ornynyń stýdenti. Oqý oryndarynyń rektorlary stýdentterdiń hostel jaǵalap júrgeninen beıhabar bolyp shyqty. Olar «bul stýdent bizden jataqhana suraǵan joq» dep qutyldy» deıdi.

Bul árıne, jastardyń, stýdentterdiń jaǵdaıyna eshkim alańdamaıtynyn bildiredi. Keshegi oryn alǵan qaıǵyly jaǵdaıdan endi úkimet te, oqý oryndarynyń rektorlary da sabaq alýy tıis.