Otbasy bankpen "oınap kóreıin" deseńiz...

Qazaqstanda bıýdjet qyzmetkeri sanatyna kirmeıtin, 200 myń teńgege jeter-jetpes ortasha aılyǵy bar, eshqandaı áleýmettik osal toptarǵa jatpaıtyn qarapaıym azamattardyń Otbasy bankinen baspana alý múmkindigi bar ma?

Banktiń baspasóz qyzmeti Qamshy.kz-ke bergen aqparatqa sáıkes, mundaı azamattar Otbasy bankinen tek 50/50 baǵdarlamasy arqyly úı ala alady. Iаǵnı, bastapqy jarnasy úı baǵasynyń jartysyna teń bolýy kerek.

Otbasy banktiń júıesi – kredıt berý úshin depozıtte qarajattyń jınaqtalýyn kózdeıdi. Onyń klassıkalyq ıpotekadan aıyrmashylyǵy – qazaqstandyqtarǵa jyldyq 3,5%-dan 5%-ǵa deıingi mólsherleme boıynsha (JTSM 3,6%-dan bastap) nesıege turǵyn úı satyp alýǵa múmkindik beredi. (Mundaı mólsherlemeni Qazaqstanda bir de bir ekinshi deńgeıli bank usynbaıdy).

Otbasyn bankinen baspana alý úshin mynadaı eń negizgi úsh talap oryndalýy kerek:

– kem degende úsh jyl boıy jınaqtaý;

– sharttyq somanyń keminde 50%-yn jınaqtaý;

– baǵalaý kórsetkishiniń eń tómengi mólsherine (OP16) qol jetkizý.

Baǵalaý kórsetkishi – bul bank klıentiniń qarjylyq tártibiniń ındıkatory. Iаǵnı, eger aı saıyn shot tolyqtyrylsa jáne depozıtti tolyqtyrý arasynda úlken úzilis bolmasa, baǵalaý kórsetkishi tez ósedi, tıisinshe turǵyn úı kredıtin tezirek alýǵa bolady. (Biraq 3 jyldan erte emes).

Otbasy bankten Turǵyn úı zaemymen, bolmasa aralyq zaemmen baspana alý múmkindigi bar.

Mysaly, Sáken esimdi azamat turǵyn úı zaemymen 40 mıllıon teńgeniń úıin alý úshin onyń 50 paıyzyn 3 jyl boıy jınasa, bank oǵan (3,5 paıyzdan 5 paıyzǵa deıin) qalǵan 20 mıllıondy nesıege beredi. Biraq Sáken úıdi alǵanda alǵan 20 mıllıon qaryzynyń paıyzyn tóleı me, álde úıdiń jalpy quny – 40 mıllıon teńgeniń paıyzyn tóleı me?

Bul saýalymyzǵa Otbasy bankiniń jaýaby mynadaı boldy:

– Azamattar turǵyn úı, ne bolmasa aralyq úı zaemdary boıynsha úı alady. Máselen, turǵyn úı zaemy boıynsha úı alý kerek bolsa, nesıe mólsherlemesi tómen (3,5% - 5%), sáıkesinshe, artyq tólem de az bolady. Iаǵnı, ol bankten alǵan 50 paıyz qaryzynyń ústinen ǵana ústemaqy paıyzyn tóleıdi. Ol úshin kem degende depozıtte úsh jyl boıy qajet somanyń 50 paıyzyn jınaqtap, baǵalaý kórsetkishiniń eń tómengi mólsherine qol jetkizý qajet.

Al aralyq zaemge kelsek, ol tolyq 40 mıllıon teńgeniń paıyzyn tóleıdi. Sebebi, ol 3 jyl boıy baǵalaý kórsetkishin kóterip, aqsha jınaǵan joq. Birden úıdiń jarty baǵasyn tólegendikten, jalpy somanyń paıyzyn tóleıdi, – dep túsindirdi bank.