• USD 468.56

  • EUR 497.56

  • RUB 7.3

  • CNY 67.18

15 Sáýir, 22:57:09
Almaty
+35°

13 Qarasha, 2023 Áleýmet

"Bolat Nazarbaevtyń jasaǵan jaqsylyǵy kóp edi"

Dostaryna, óner adamdaryna, aqyndar men jazýshylarǵa kómektesken deıdi.

sýret ǵalamtor jelisinen alyndy

Búgin eks-prezıdenttiń inisi Bolat Nazarbaev dúnıeden ótti. Buǵan bireý qýanyp, bireý qaıǵyryp júr. 

Ras, áleýmettik jelide qaraly habarǵa qabyrǵasy qaıysqandar men Bolat Nazarbaevtyń ajalyn súıinshi suraǵandaı qylyp, marqumdy tabalaǵandar da tabyldy.

Bizdiń Bolat Nazarbaevpen alty alamyz, bes beremiz joq. Degenmen, Bókeń halyqqa ne jaqsylyq jasady degen saýalǵa jaýap izdep, ınternetti sholyp kórdik. 

Sóıtsek, marqumnyń jaman qyrlary ǵana emes, elge jasaǵan azdy-kem jaqsylyǵy da tabyldy. 

Máselen, onyń «Salıqaly urpaq» qoǵamdyq qaıyrymdylyq qorynyń ózi marqum qaıyrymdy jan bolǵan degen paıymǵa jeteleıdi. Bul qor arqyly Bolat Nazarbaev ómirde qıyn jaǵdaılarǵa tap bolǵan adamdar men jasóspirimderge, balalarǵa kómek jasap kelgen.  

«Salıqaly urpaq» qorynyń dırektory Qasym Qasabektiń málimetinshe, qorǵa qarasty «Bereke úıi» óz tárbıelenýshilerine barlyq jaǵdaıdy jasap kelgen. Odan bólek, kópbalaly otbasylar men jaǵdaıy tómen otbasylarǵa kóz qyryn salyp, azyq-túlikpen qamtamasyz etti.

– Pandemııa kezinde mektepter onlaın rejımge aýysyp, jaǵdaıy joq otbasylardyń balalary noýtbýk tappaı qınalǵan bolatyn. Sol kezde Bolat Nazarbaev 1000 balaǵa noýtbýk berdi. Sosyn koronavırýsqa qarsy kúreske 150 mıllıon teńge bólgen edi.

Túrkistan oblysynyń Maqtaaral aýdanynda sý tasqynynan zardap shekken otbasylarǵa 20 úı salyp berdi, alǵashqy kúni japa shekken jandarǵa 20 tonna gýmanıtarlyq júk jetkizip, olardyń balalaryna jazǵy lagerge tegin joldama áperdi. Zeınetaqysyn jetimder úıine qaıyrymdylyqqa aýdaryp otyratyn, ol 18 jyl boıy 380 balaǵa qamqorlyq jasady», – deıdi ol.

Bolat Nazarbaev ónerge qatty mán bergen. YouTube-tegi «Aına» kanalyna bergen suhbatynda: «istegen jaqsylyǵymdy eshqashan aıtqan emespin. Onyń bárin aıta berý de yńǵaıyssyz. El qalaı túsinedi, bilmeımin. Árkimniń aýzyna qaqpaq bola almaısyń. Meni bári halyqtyń aqshasyn alady dep oılaıdy. Biraq áli kúnge deıin bireýdiń ala jibin attap kórgen emespin. Eshkimniń eshteńesin alǵan joqpyn. Halyqqa, dostaryma, óner adamdaryna, bárine kómekteskim keledi» depti.

Ulttyq mádenıet pen memlekettik tildi damytýǵa úlesin qosyp kelgenin jýrnalısterge bergen talaı suhbattarynan ańǵarýǵa bolady. Qaı suhbatynda da sózine ózge tildi aralastyrmaǵan eken. Halyq ony toıymsyz, dúnıequmar, áıelqumar dep aıyptaǵanymen, ol ózin qarapaıym, tártipke baǵynǵan janmyn dep eseptedi. Birde kóligin ózi júrgizip kele jatyp suhbat bergen bolatyn. Onda Bolat Nazarbaev jol óziniń erejelerdi saqtaıtyn tártipti júrgizýshi ekenin aıtqan.

– Men tártipti júrgizýshimin. Eshqashan jyldamdyqty asyrmaımyn. Qalanyń ishki kóshelerinde 50-60 jyldamdyqpen júrsem, ál-Farabı dańǵylynda 80-nen asyrmaımyn, deıdi.

Bolat Nazarbaevtyń birneshe meshit saldyrǵanyn kópshilik bilmeıdi. Ol Almaty oblysynda 350 oryndyq jáne Almatyda 1000 adamǵa arnalǵan meshit salǵan. Raıymbek aýdanyndaǵy Narynqol men Kegen aýyldarynyń 33 ımamyna 10 mıllıon teńgeden syıaqy úlestirgen. Bul týraly Qasym Qasabek: «ımamdar tek meshittiń qyzmetkeri ǵana emes, olar psıholog, muǵalim, meshittiń otymen kirip, kúlimen shyǵatyn adamdar. Sondyqtan oraza aıynda osyndaı jandarǵa aqshalaı kómek berdik» deıdi.

Bolat Nazarbaev týraly osy ýaqytqa deıin taralyp kelgen alyp-qashpa jaman áńgimelerge qatysty qyzy Gúlmıra Ábisheva: «ákem 2015 jyldan beri densaýlyǵynyń nasharlaýyna baılanysty bıznesti qoıyp, onyń qasyndaǵy senimdi adamdarǵa qaldyrdy. Sengen adamdary endi bárin teris aınaldyryp, bizge qarsy shyǵyp jatyr. Keshe ǵana bir dastarhanda birge otyryp, tórimizde aǵalap-kókelep júrgender edi. Qazir sol kisilerge meniń renishim bar. Kezinde talaı adam «brat, brat», «aǵa-kóke» dep qasynan shyqpaı, sháıimizdi iship júrgen. Qazir qaıda solar? Bireýi joq. Tanymaıtyn adam sııaqty qasymyzdan ótip ketedi. Negizi, ákem óte kóp adamǵa jaqsylyq jasady. Keıde oılaımyn, nege solardy aıtpasqa dep? Bári tek jaman jaǵyn aıtady, jaqsylyǵyn umytyp ketken. Qazir aıtsaq, maqtanǵandaı bolamyn. Sondyqtan bárin bir Allaǵa tapsyrdym» degen renishin bildirdi.

Bıfat Eltaeva

Avtormen onyń Facebook paraqshasy arqyly habarlasýǵa bolady.

Jazylyńyz

"Qamshy" silteıdi

Qate tapsańyz, qajetti bólikti tańdap ctrl+enter basyńyz.

Pikir qaldyrý

pikir