Esti adam memlekettik marapattan aýlaq júredi

"Qurmet" degen daýly orden boldy. Memleket mereke saıyn marapattaı beredi, bul medal «qur med» degen qunsyz ataq aldy.

Álı Oqapov degen ánshi shyqty, alǵan "Qurmet" ordenimdi qaıtaryp berýge daıynmyn dep.

Bul – 1993 jyly Nazarbaevtyń jarlyǵymen bekitilgen orden edi. Ekonomıka, áleýmettik sala, ǵylym men mádenıet, bilimdi damytýǵa eńbek sińirgender, memlekettik organdardaǵy úlgili qyzmeti jáne belsendi qoǵamdyq jumys úshin beriletin.

Bılik memlekettik marapat taǵaıyndaýda qarapaıym azamattarǵa basymdyq beremiz dep sendirýge tyrysady. Shyndyǵynda ordender basshylyqtyń usynysymen ǵana úlestiriledi. Kóbine óńsheń jaǵympaz, tek bılikke qyzmet etkender alady. Bılikti synamaıtyndar ǵana qyzmetke taǵaıyndalyp, solar marapattala bergen soń, orden-medaldyń quny qalmady.

– Ordenge qatysty sońǵy daý-damaı oılandyrmaı qoımady. Álıge obal boldy. Árıne, memleket bolǵasyn marapattaý da bolady, biraq bul úrdis bizde júıesiz, erejesiz, temir-tersek taratý sekildi áser qaldyrady.

El táýelsizdiginiń 30 jyldyǵy qarsańynda "Qurmet" ordeni maǵan da tıgen. Bir aǵaıyndar keri tapsyr, sen úshin bul mazaq degendeı áńgime aıtty. Biraq men muny ózim qatysqan azattyq jolyndaǵy kúrestiń esteligi dep kórip, bas tartpadym. Kezinde marqum Jasaral aǵamyzdyń oppozısııaǵa keterde "Parasat" ordeninen bas tartam degeni bar. Biraq ordennen bas tartýdyń zańdy joly joq eken ǵoı! "Astananyń 10 jyldyǵy", "20 jyldyǵy" degen toılarda myńdaǵan medal shyǵaryp, ony Reseıden kelgen talaı qonaq ýystap alyp ketken. Bul jaǵynan qaraǵanda, orden-medaldiń qadiri qalmady.

Ashyǵynda, jappaı orden-medal taratý degen sovetten qalǵan dástúr ǵoı. Biz soǵan kádimgideı kúıip-pisemiz, alǵanymyz da, almaǵanymyz da. Soǵan qaraǵanda, jan-dúnıemiz sol dáýirden alystamaǵan eken. Memleket te áli sol dástúrden uzap kete almapty, – dep pikir aıtqan eken "Qurmet" ordeniniń ıegeri Serik Erǵalı.