20 myń polıseıdiń "mıtıngisi"

Muhtar Áblıazov shaqyrǵan mıtıngige qansha qazaq shyqty? Alańǵa shyqqandardan buryn úıinde tynysh jatqan jerinen ustalǵan belsendiler kóp boldy bul joly. Úıinde jatyp, áli eshteńe istep úlgermegen adamdy alyp ketý qanshalyqty zańdy degen suraq týady. «Qasqyrdyń aýzy jese de qan, jemese de qan» demekshi, endi belsendilerdiń árbir mıtıng qarsańynda qamalatyn túri bar.

Alash arystaryn abaqtyǵa qamatty, qoıdaı qyrdy, dep keńes úkimetin aıyptaǵanda jeldeı ushyp jelpinemiz. Qazir she? Búgingi qazaqtyń arasynda da qýdalanǵandar qatty kóbeıip barady. Sońǵy mıtıngige halyq emes, úkimet jaqsylap daıyndaldy. IIM 20 myń polısııa qyzmetkerin jumyldyrdy.

– Eger beıbit jınalystardy uıymdastyrý jáne ótkizý tártibi týraly zańnamasyn buzsa, QR Ákimshilik kodeksiniń 488-babynyń talaptaryna saı, ákimshilik jazaǵa tartylady, ol bapta qamaqqa alý da, aıyppul da bar. Sheshimdi sot qana qabyldaıdy. Sottyń qaýlysy (sheshimi) bolmaı, qamaqqa alý zańsyz. Osy baptyń sheńberinde sot qarasa, 10-20 táýlik aralyǵynda qamaqqa ala alady. Osy baptyń tarmaqtaryna saı merzim belgilenedi. Al eger eshqandaı aıyp, ıaǵnı sottyń sheshimisiz qamaqqa alý zańsyz, deıdi zańger Erkebulan Qaıratuly.

 Aman Mámbetáli, saıasattanýshy:

– Mıtıng dástúrge aınalyp barady. Áblıazov saıası kúshtiń ıesi sııaqty kórip júrgenimen, shyndyǵynda pıardan basqa túgi joq. Artynan ergender bar, biraq ony túsinetinder az. Ol talaı jyl qatarynan medıa keńistikte pıar aksııa uıymdastyryp keledi. Osy joly da eldiń, ásirese memleket qyzmetkerleriniń kóńilin burǵyzyp, óziniń bar ekenin taǵy bir kórsetti. Naqty usynyp otyrǵan saıası programmasy joq, taza popýlızm. Zeınetkerge 300 myń, kásiporyn jumysshylaryna 1 mln teńge aılyq qosamyz degeni «men prezıdent bolsam...» degen balanyń qııalyna uqsaıdy.

Mıtıngke keletin bolsaq, meni de beıbit sharalarǵa qatysqanym úshin 17 ret aýdandyq ishki ister bólimine aparǵan. Bizdiń elde 30 jylda júıe bolyp qalyptasqan elıtanyń kózqarasy – partııa tek bir adamǵa baılanysty degen teris túsinigi. Áblıazov ta sondaı qatelikke urynyp, men lıdermin dep, arty urys-qyrylys bop, ózi jalǵyz qaldy. Demokratııanyń fılosofııasy bir ǵana partııa, bir ǵana kúsh emes. Ol aýysýy kerek. Búgin oppozısııa, erteń bılik. Bir aıtarym, zań bar, eger ol zańdy qabyldamaı, onyń sheńberinen tys áreket etse, árıne, qýdalanady. Qoǵamda dál qazir bılik ókilderine, polısııa qyzmetkerlerine kúmán kóp, senim az. Biraq zańǵa salsa, bári durystalady.

Murat О́tebaıuly, ardager jýrnalıst:

– Sozylmaly sıpat alǵan daǵdarys, shegine jetken jemqorlyq, saılaýdaǵy ádiletsizdik, baǵa men tarıfterdiń ósýi, AES salýǵa degen qarsylyq sııaqty túrli máseleler halyqty mıtıngke shyǵýǵa ıtermeleıdi. Úkimetke degen únin osylaı ǵana jetkize alady. Birer adam shyqsa bolǵany, ákimshilik jazaǵa tartylyp otyr. Buny keshegi 25 qazandaǵy jaǵdaıdan kórip otyrmyz. Sonda halyq bas qosyp, óz oıyn aıta almasa ne bolǵany?! 20 myń polısııany jumyldyrý degen sumdyq endi. Keńestik júıedegi qýdalaý áli de qalmapty. Bul halyq narazylyǵyn kúsheıte túsedi. Zań shekteýli sheńberinde jumys isteýi kerek. Bizde qazir oppozısıonerler qalmady. Bárin sottady, temir torǵa toǵytty. Tek halyqshyl azamattar óz oıyn ashyq aıtqany bolmasa, oppozısıoner joq. Al depýtattyq mansapta otyryp, jelpinip sóılep júrgender halyqqa emes, úkimetke jumys isteıdi. «Depýtattar myna máseleni kóterip jatyr» dep el sonsha maqtaıdy kelip. Onyń bári úkimettiń tapsyrysymen, kelisimimen ǵana aıtylyp otyr. Bul «belsendilerdiń» tarıhyn jaqsy bilemiz. «Amanat» arqyly qalaı saılaýǵa ótkenin de kórdik. Áıtpese óz erkimen túsken azamattardyń biri de ótken joq. Saıası reforma degen sóz júzinde ǵana qaldy. Jasaıtyndary sol baıaǵy bir konferensııa men jınalys.

Tık-tok áleýmettik jelisinen alynǵan pikirler