Júgir nemese О́l!

Áleýmettik jelilerde balalardyń kóliktiń jolyn kesip, júgiretin jańa oıyn túri shyqqan eken. Máselen, bala jolda kele jatqan kólikti tosyp turady eken de, kólik jaqyndaǵanda kósheniń arǵy betine joldy kesip, júgirip ótedi. Al qalǵan balalar bul qaýipti áreketti baqylap turady. Joldy kesip ótip aman qalǵan oıynshy jeńimpaz atanady.

Kim kináli bolady?

bul qaýipti oıyndy balalardyń ózi ádeıi uıymdastyrsa da, qaıǵyly jaǵdaı bolǵanda, balalar emes júrgizýshiler kináli bolady eken. Buǵan qatysty zańger Baǵdat Amandosuly: "Fakti boıynsha kólik júrgizýshisi QR Qylmystyq kodeksiniń 345-baby boıynsha ıaǵnı Kólik quraldaryn basqaratyn adamdardyń jol júrisi nemese kólik quraldaryn paıdalaný qaǵıdalaryn buzý boıynsha jaýapty bolady. Sebebi QR Azamattyq kodeksiniń 931-babynyń 1 bóligi boıynsha joǵary qaýiptilikpen baılanysty kólik quraldarynyń ıeleri eger zııan dúleı kúshterdiń nemese jábirlenýshiniń teris pıǵylynyń saldarynan paıda bolǵanyn dáleldemese, onda joǵary qaýiptilik kózderimen keltirgen zııandy óteýge mindetti bolyp tabylady, – deıdi zańger. 

Mundaı qaýipti oıyn Qazaqstannyń birneshe qalalarynda bolyp jatyr. Tipti túngi ýaqytta da jasóspirimderdiń mundaı qaýipti oıynmen oınap júrgeni jaıly beınejazbalar áleýmettik jelilerde kóp taralyp jatyr. Mysalyǵa, Aqtaýdaǵy oqıǵa boıynsha balalar kóliktiń aldyn kesemin dep, kólik astyna túsýge shaq qalsa, Rýdnyıda kishkentaı balany kólik qaǵyp, qaıǵyly jaǵdaıǵa dýshar bolǵan.  

Buǵan deıin «Júgir ne О́l!» oıyny Reseı, Belarýs. Ýkraınada bolǵan eken.