Taldyqorǵan qalasyndaǵy «Jastar-2» shaǵyn aýdanyna gaz berildi

Respýblıka kúni qarsańynda Taldyqorǵan qalasyndaǵy «Jastar-2» shaǵyn aýdanyna gaz berildi. Endi mundaǵy eki myńnan astam turǵyn kógildir otynnyń ıgiligin kóretin bolady.

Saltanatty túrde atap ótilgen is-sharaǵa oblys ákiminiń orynbasary Áset Qanaǵatov pen qala ákimi Ernat Bázil qatysyp, jurtshylyqty qýanyshtarymen quttyqtady.

Á. Qanaǵatov turǵyndardy oblys kóleminde atqarylyp jatqan gazdandyrý sharalary jaıly habardar etti.

О́z kezeginde qala ákimi jańa shaǵyn aýdannyń ınfraqurylymyn damytý jumystaryna keńinen toqtaldy.

«Jastar -2» shaǵyn aýdanynda 22 shaqyrymǵa gaz qubyry tartylyp, oǵan 295 mln. teńgeden astam qarjy bólindi. 2022 jyly qurylys jumystaryn bastaǵan «Rem stroı» JShS búginde jobany tolyq aıaqtady. Sóıtip 526 abonenttiń gazǵa qosylýyna múmkindik jasalyp otyr. 2025 jylǵa deıin qalanyń barlyq aımaǵyna gaz tartý josparlanǵan. Jalpy «Jastar-2» turǵyn úı alabynyń ınfraqurylymyn jaqsartýǵa baǵyttalǵan jumystar kezeń-kezeńimen atqarylyp keledi. Atap aıtqanda, munda 21 shaqyrymǵa aýyz sý qubyry tartylyp, búginde turǵyndar 100% aýyz sýmen qamtylyp otyr, - dedi E.Bázil. Onyń aıtýynsha, turǵyn úı alabyn abattandyrý maqsatynda 16 kóshede zamanaýı úlgidegi 514 jaryq baǵany ornatylǵan. Budan bólek, joldyń sapasyn jaqsartý úshin 13 kósheniń 11,2 shaqyrymyna jobalyq-smetalyq qujattama ázirlenýde. Sol sııaqty Memleket basshysy Qasym-Jomar Toqaevtyń bastamasymen qolǵa alynyp jatqan «Jaıly mektep» jobasy aıasynda turǵyn úı alabynda 900 oryndy metep qurylysyn júrgizý úshin jobalyq-smetalyq qujattamasy ázirlenip, keler jyly qurylys jumystary bastalatyn bolady.

Sonymen birge jyl sońyna deıin «Yntymaq» jeke turǵyn alabynyń 9500-ge jýyq turǵyny jáne Taldyqorǵan qalasynyń ishinde qalǵan ýchaskelerdegi 585 turǵyn gazǵa qol jetkizse, kelesi jyly Moınaq aýylyna gaz qubyry tartylyp bitýi tıis.

Erteń Qaratal aýdanynda Kálpe jáne Oıan aýyldaryna gaz berilip, olardaǵy 700 úı kógildir otynnyń ıgiligin kóretin bolady.

2025 jylǵa deıin Kerbulaq aýdanynan Taldyqorǵanǵa deıingi eldi mekender tolyq gazdandyrylýy tıis. Al 2030 jylǵa qaraı óńirdi gazdandyrý 100%-ǵa jetedi nemese 192 eldi mekendi qamtylady dep mejelenip otyr.