Itke súıek. Qazaqstanda zeınetaqy 14 teńgege ósti

Qazaqstanda ortasha zeınetaqy 14 teńgege ósti! Buǵan deıin ortasha zeınetaqy tamyzda 120 923 teńge bolsa, qyrkúeıekte 120 937 teńge boldy. Qazan aıyndaǵy esep boıynsha 120988 tg quraıdy. Iá, bar qosylǵany 14 teńge bop shyqty.

– Zeınetkerlerge elimizde eshqandaı jaǵdaı jasalmaı keledi. Tek «Qarttar kúni» degen merekemiz ǵana bar. Sanatorııge jataıyq desek, búkil bala-shaǵańnyń tapqan tabysyn eseptep alyp kel deıdi. Olardyń tabysynyń maǵan ne qatysy bar? 55 jyl muǵalim bolǵan adammyn. Kezinde muǵalimderge tegin sanatorıı bolatyn. Ol kezde jas boldyq, ári jumysbasty bolyp, barmaıtynbyz. Endi beınetimniń zeınetin kórem degen shaqta mundaı múmkindikterdiń bári joıylyp ketti, – deıdi ardager ustaz Myrzahan Qabasov.

Al áleýmettanýshy Mánsııa Sabyrova burynǵy «biryńǵaı jınaqtaýshy zeınetaqy qory» durys ekendigin aıtady.

– Biz zeınetaqy tóleýdiń jańa júıesine ótip jatyrmyz. Buryn biryńǵaı jınaqtaýshy zeınetaqy qory boldy. Al qazir zeınetaqyny jınaǵanyńa qaraı alasyń. Ekinshiden, bizdegi zeınetke shyǵý jasyn qaıta qarastyryp, eń tómengi zeınetaqy mólsherin kóterý qajet. Olaı bolmasa, onda búgingi jastar qartaıǵanda qınalyp qalmaýy úshin qazirden bastap zeınetaqyǵa qarjyny ózi sala bergeni durys.

Sonymen birge, zeınetke shyǵý jasyn mamandyqqa saı bólgen durys. Máselen, shahter, balerınalar 40 jastan keıin jumys isteı almaıdy. Sondyqtan da olardyń zeınetke shyǵý jasyn qysqartý kerek dep oılaımyn. Odan bólek, emdelýge, dári-dármek satyp alýǵa  arnaıy múmkindikter bólip, turǵyn úıdiń tólemaqylaryn tóleý sekildi jaǵdaılardy qarastyrý kerek, – deıdi áleýmettanýshy.

Iıa, qazir qatty qymbatshylyq júrip jatqan keeń bolǵandyqtan, aqsha qunsyzdanyp barady. Ekonomıkalyq ahýalymyz onsyz da jaqsy emes. Munyń bári zeınetkerlerge aýyr tıip jatqany ras. Qarttardyń bar zeınetaqysy dári-dármekke ketedi. Buǵan qatysty májiliste depýtat Ádil Jubanov ta zeınetkerlerdiń máselesin kóterip, saýal tastaǵan bolatyn.

– Elimiz baı bolsa da, áleýmettik qoldaýdy qajet etetin az qamtylǵan halyq sany jyl saıyn artyp keledi. 30 jyl boıy halyq eń tómengi jalaqy men zeınetaqyny mise tutyp keledi. Odan halyq qaryzǵa kirip, nesıe quryǵyna túsip jatyr. Memleket belgilegen eń tómengi zeınetaqy mólsheri – 57 853 teńgege ómir súrý múmkin emes. Eń tómengi zeınetaqyny alatyn kim? Ol – eńbek ótili joq, zeınetaqy qoryna aqshasy salynbaǵan adam. Ondaı adamdar kóbine aýyldyq jerdiń turǵyndary. Aýyl turǵynynda eńbek ótili  qaıdan bolady, eger sol kezdegi memleket basshysy jumys istep turǵan sovhozdar men kolhozdardy kúshpen taratyp, endi biz etti Brazılııa, Argentınadan alamyz dese? Halyqtyń osyndaı jaǵdaıǵa tap bolǵanyna bıliktiń kinási zor. Sondyqtan da jańa zeınetaqy reformasyn jasaqtap, eń tómengi zeınetaqyny mólsherlemesin eń tómengi jalaqy mólsherimen teńestirýdi usynamyn, –dedi depýtat.

Qalaı bolǵanda da, elimizde zeınetkerlerdiń qartaıǵan shaǵynda beınetiniń zeınetin kórgeni abzalyraq.