Taýly Qarabaqtan armıandar údere kóshýde

Taýly Qarabaq aımaǵynan birjola ketýdi jón sanaǵan armıandardyń alǵashqy toby Armenııaǵa keldi.

Azattyqtyń azerı qyzmeti habarlaǵandaı, olar Armenııanyń ońtústigindegi Sıýnık aımaǵyndaǵy Kornıdzor aýylyna jaıǵasty. Sol jerde gýmanıtarlyq kómek kórsetý orny quryldy.

Bul jerge sonymen birge Taýly Qarabaqtaǵy qaqtyǵys kezinde jaralanǵan 23 adam jetkizilgen.

Armenııa premer-mınıstri Nıkol Pashınıan jeksenbide Ázerbaıjan Taýly Qarabaqtaǵy armıandarǵa qaýipsizdik kepildigin berse, ólke olardy qabyldaýǵa daıyn ekenin aıtqan.

Taýly Qarabaqta qazir 120 myńdaı etnostyq armıan turady.

Taýly Qarabaqtyń jikshil bıligi Ázerbaıjannyń áskerı áreketterinen keıin úısiz qalǵan jáne Taýly Qarabaqtan ketýdi qalaǵan otbasylar orys áskeriniń kúzetimen Armenııaǵa jetkiziletinin málimdegen.

Resmı Baký Qarabaq turǵyndaryn qorǵaýǵa alyp, reıntegrasııalaıtynyn, qarý-jaraǵyn tastaǵan armıan kúshterine raqymshylyq beretinin aıtyp jatyr.

24 qyrkúıekte Armenııa premer-mınıstri Nıkol Pashınıan Taýly Qarabaqta "etnostyq qýǵyndaý" qaýipi bolyp jatqanyn, aımaqtaǵy armıandardyń qaýipsizdigi úshin jaýapkershilik Ázerbaıjan men Reseı kúshteriniń moınynda ekenin eskertti.