Májilis depýtattary áskerdegi qyzmetti jaqsartý qajettiligin zerdeleýde

Májilistiń Halyqaralyq ister, qorǵanys jáne qaýipsizdik komıtetiniń músheleri QR UQK Shekara akademııasy kýrsanttaryna arnalǵan lagerde úsh kúnnen beri oqý-jattyǵý jıynyna qatysýda.

Olar – Májilis depýtattary Maksım Rojın, Oljas Quspekov, Bolat Kerimbek jáne Samat Nurtaza. Kýrsanttarmen birge apta boıy taýdaǵy lagerde turyp, jattyǵady. Sodan keıin depýtattar Qytaı jáne Qyrǵyzstanmen memlekettik shekarany qorǵaıtyn bolady. 

Depýtattar shekara áskerleri sońǵy úlgidegi tehnıkamen jabdyqtalyp, onda úzdikterdiń úzdikteri qyzmet etýi kerek dep esepteıdi. О́ıtkeni elimizdiń qaýipsizdigin qamtamasyz etý boıynsha eń kúrdeli jaýyngerlik mindetterdi kún saıyn oryndaıtyn – osy shekarashylar.

–Táýelsizdik shekaradan bastalady. Shekarashylarymyzdyń daıyndyǵy joǵary, Otan ıgiligi úshin adal qyzmet etýge daıyn ekenin kórip otyrmyz. Bıik taýdaǵy shekarany qorǵaýdyń qyr-syrymen tanystyq. Bul óte kúrdeli de naǵyz erlerge laıyq jumys. Lager komandada jumylyp jumys isteýge úıretedi, - dedi depýtat Maksım Rojın.

Depýtattar kýrsanttarmen birge shatyrlarda turady. Taýly aımaqta erte turyp, sapqa turyp, taktıkalyq tapsyrmalar men  jaýyngerlik daıyndyqtan ótedi. Olar taýǵa kóterilýdi, tolyq qarý-jaraqpen birneshe shaqyrymdyq marsh laqtyrýdy úırenedi.

– Kúndiz aýa temperatýrasy +32, túnde +4 bolatyn taýlardaǵy shatyrlarda turý. Tańerteńgi saǵat 6-da oıaný, qolaıly jaǵdaıdyń joqtyǵy – osynyń bári bizdiń shekarashylar jaǵdaıy. Bul sabyrlylyqqa, tózimdilikke tárbıeleıdi. Áskerdegi qyzmet – uldarymyzdy er-azamat qylyp tárbıeleıtin patrıottyq orta.  Jaýapkershiliktiń, tártiptiń ne ekenin túsinýdiń jalǵyz joly osy. Múmkindiginshe jastarymyz osydan ótýi kerek, – deıdi Oljas Qusbekov.

Jaǵdaı men turmys-tirshilikti zerdeleýmen qatar, depýtattar áskerı qyzmetshilermen áńgime-dúken quryp, materıaldyq-tehnıkalyq qamtamasyz etý, eńbekaqy jáne basqa da birqatar júıeli máselelerdi anyqtady.

– Memleket basshysy áskerı qyzmetshiler úshin jaǵdaıdy jaqsartý qajettigine birneshe ret nazar aýdardy. Elordaǵa ár sarbazdyń, ár ofıserdiń máselesin jetkizemiz. Kúrdeli problemalardyń biri – ofıserlerdiń jalaqysynyń tómendigi, orta eseppen 170-220 myń teńge. Búgingi naryqpen bul óte az. Turǵyn úı, áleýmettik qamsyzdandyrý máseleleri bar. Árbir zastavada tıisti tehnıkalyq quraldardyń bolýy mańyzdy. Drondar, zamanaýı qarý-jaraq, kólik bolýy kerek, – deıdi Májilis depýtaty Samat Nurtaza.

Joba barysynda depýtattar ulttyq qaýipsizdik júıesin jetildirýge baǵyttalǵan jańa zańnamalyq bastamalar men sharalardy, jastardy otansúıgishtikke tárbıeleýdegi tásilderdi, sondaı-aq áskerde qyzmet etý jaǵdaılaryn jaqsartý qajettiligin zerdeleýdi kózdep otyr.