Fransııa Ýkraınadaǵy "Golodomordy" genosıd dep tanydy

Seısenbi kúni Fransııa Ulttyq assambleıasynda 1932–1933 jyldary Ýkraınada bolǵan "Golodomordy" genosıd dep taný týraly qararǵa daýys berý ótti. Depýtattar kópshilik daýyspen "Golodomordy" genosıd dep tanyǵan. 

Daýys berýge 170 depýtat qatysty. 168 depýtat qaýly qabyldaýdy qoldap, qalǵan ekeýi qarsy daýys berdi, dep habarlady "RIA Novostı" aqparattyq portaly. 

"Ulttyq jınalys kópshilik daýyspen qaýly qabyldady" – dedi ulttyq assambleıa tóraǵasy.

Ýkraınada Kıev bıligi "Golodomor" dep ataǵan asharshylyqty "ýkraın halqynyń genosıdi" dep moıyndaıtyn zań bar. Alaıda asharshylyq sol kezde Ýkraınany ǵana emes, KSRO–nyń kóptegen aımaqtaryn, sonyń ishinde Qazaqstandy da qamtydy. Asharshylyq kesirinen qazaqtar sany 38–42% ǵa azaıyp, biraz bóligi aman qalý úshin Qytaıǵa, Aýǵanstan men Túrkııaǵa ótip ketken.

Eske sala keteıik, Germanııa úkimeti ótken jyldyń jeltoqsanynda "Golodomordy" qoldan jasalǵan genosıd dep moıyndaǵan bolatyn. Al Reseı bıligi bul ustanymdy "tarıhqa qaıshy ári aqylǵa syıymsyz" dep baǵalaǵan edi.