"Qaza tapqan qyzymdy 7 mln teńgege baǵalap otyr ma?": Aıdos Meldehan "Qazaqstan halqyna" qoryna jaýap berdi

Búgin "Qazaqstan halqyna" qorynyń resmı ókili redaksııamyzǵa hat joldap, Qańtar oqıǵasynda qaza tapqan Aıkórkemniń ákesi Aıdos Meldehanǵa birneshe ret qarjylaı kómek kórsetilgenin habarlady. Qor ókili hatta Aıdos Meldehannyń Qamshy tv arnasyna bergen suhbatyndaǵy aqparattyń shyndyqqa janaspaıtynyn jazǵan. 

Qamshy.kz aqparat agenttiginiń tilshisi Aıdos Meldehanǵa habarlasyp, máseleniń jaı-japsaryn bildi. Aıkórkemniń ákesi "Qazaqstan halqyna" qorynan qarjylaı kómek alǵanyn rastady. Alaıda qordan bólingen qarajat shyǵyndardy tolyq óteýge jetpegen. Sol sebepti Qańtar oqıǵasynda 7 oq tıip jaralanǵan Janel esimdi qyzynyń emi úshin astyndaǵy kóligin satyp, aǵaıyn-týys pen halyqtan kómekke aqsha jınaǵan. 

"Aıkórkemniń qazasyn kózimen kórgen Janel áli kúnge deıin em alyp júr. Túrkııada denesindegi oqtan qalǵan fragmentterdi alyp tastaý úshin ota jasaldy. Ota aıaqtalǵannan keıin, 2 saǵattan soń qyzymdy "qonaq úıge baryńdar", dep klınıkadan shyǵaryp jiberdi. Denesinen oqtyń qaldyqtaryn ala salyp, kúrdeli ota jasaı tura eshqandaı kútim kórsetpeı aýrýhanadan birden shyǵaryp jiberý sumdyq qoı! Sol kezde Oljas Qudaıbergenovke kómek surap habarlastym. Biraz aıqaı-shý boldy. Aqyr sońynda polısııa qyzmetkeri qyzym men áıelimdi klınıkadan qýyp shyqty. Qordaǵylar sonyń bárin jaqsy biledi. Sol jaǵdaıdy esten shyǵarmasyn"–deıdi Aıkórkemniń ákesi.

Aıdos Meldehan Túrkııamen kelisimshart durys jasalmaǵanyn aıtty. Tipti, ol táýelsiz BAQ-qa suhbat berip, shyndyq izdegen soń ádeıi osyndaı áreketke jasaldy dep kúdiktenetinin aıtyp qaldy. 

"Qazaqstan halqyna" qory qaza tapqan kishkentaı qyzymdy 7 mln teńgege baǵalap otyr ma? Qyzymnyń ornyn eshqandaı aqsha toltyra almaıdy"– deıdi Aıdos Meldehan.

Budan bólek qyzynan aıyrylǵan áke Qańtar qyrǵynynda 4 jasar Aıkórkemniń súıegin morgtan alyp ketý úshin óz qaltasynan 2,5 mln teńge tólegen.

"Morgtaǵy qyzmetkerler qyzymnyń denesin alyp ketý úshin 2–3 mln tóleý keregin aıtty. Týǵan-týystan aqsha jınap, súıegin áreń alǵanbyz. Al Janeldiń denesinde oqtyń qaldyqtary áli bar. Psıhıkalyq jaǵdaıyn eseptemegen kúnniń ózinde em-domy bitken joq. Ár shyǵynymdy eseptesem, qordyń bólgeninen asyp ketedi. Soǵan qarajatym jetpegenine ashynamyn. Qyzyńyzdy oqýǵa túsiremiz degen edi. Ol da jaıyna qaldy. Beıbit zamanda bir balamdy atyp óltirdi, endi aman qalǵan qyzym úshin shyryldap júrmin"– dep málimdedi Aıkórkemniń ákesi.