• USD 468.56

  • EUR 497.56

  • RUB 7.3

  • CNY 67.18

15 Sáýir, 22:32:58
+35°

Qańtar qyrǵynynda qaza bolǵan 4 jasar Aıkórkemge qatysty qylmystyq is áli jalǵasyp jatyr. Sot Aıkórkemge oq atqan 5 sarbazdan kúdikti emes kýáger retinde jaýap alǵan. Al 4 jasar qyzdyń ólimine vzvod komandıri ǵana kúdikti retinde tanylǵan. Tergeýdiń ádiletsiz ótip jatqanyn aıtqan Aıkórkemniń ákesi Aıdos Meldehan Qamshy.kz aqparat agenttigine suhbat berdi. 

– Aıkórkem ómirden ótkeli otbasymda eshkim eńsesin kótere almady. Qyzymyzdy saǵynamyz, zırat basyna jıi baryp turamyz. Aıkórkemniń qazasyn óz kózimen kórgen ulym áli kúnge deıin "qaryndasymdy qutqara almadym", dep jylaıdy. Tete ósken aǵasy kósheden qaryndasymen qurdas qyzdardy kórse "Aıkórkemdi taýyp berińder" dep shý shyǵarady. Al úlken qyzym "onyń ornyna nege men ketpedim" degen kezde janymdy qoıarǵa jer tappaımyn", – dep kózine jas aldy Aıdos Meldehan.

Aıdos Meldehannyń bir aıaǵy synyp, júrip-turýy qıyndaǵan. Úıine barǵan kezde "eńbektep áreń júrgenin" aıtyp, bizdi kútip ala almaǵany úshin bizden keshirim surady. 

– Meniń de densaýlyǵym bolmaı júr. Aıkórkem qaza bolǵan kúni úlken qyzym Janel de jaralanǵan edi. Dárigerler denesinen 7 oq shyǵardy. Qyzyma birneshe ret ot jasaldy. Jan-jaqtan kómek suradyq. "Qazaqstan halqyna" qorynyń bastyǵy basqa kómek kórsetýden bas tartty. Kómektesemiz degen Oljas Qudaıbergenovke habarlasqanymda "Bolat Jamıshev kelisim bermedi" dep qysqa qaıyrdy. Al Almatynyń ákimi bolyp saılanǵanan bastap Erbolat Dosaevtyń qabyldaýyna jazyla almaı júrmin. Ol óziniń mańyna da jolatpaıdy. Qazaqstanda ákimdiktiń aldyna baryp ózińdi órtep jiberetinińdi aıtsań da ákimmen kezdese almaısyń. Tek ákim orynbasary ǵana kabınetinen shyǵýy múmkin, – dedi Aıdos Meldehan.

Qyzynyń ólimine qatysty sot úkimin kútip otyrǵan Aıdos Meldehan halyqaralyq sotqa aryzdanatynyn aıtty. Alaıda ol otbasynyń qaýipsizdigi úshin alańdaýly. Sol sebepti bala-shaǵasymen birge shetelge kóship ketkisi keledi. 

– Bireýge mal qaıǵy, bireýge jan qaıǵy. Densaýlyǵym bolmaı, dárigerge júgirip júrsem saılaýdyń kandıdattary "maǵan daýys beretinińizdi aıtyp, vıdeo túsirińizshi" dep ótinish jasap júr. Qazirgi kandıdattarǵa sený qıyn. Saılaý bitken soń árqaısysy jyly ornyna jaıǵasyp alady. Tipti olardyń taǵdyry saılaýǵa deıin sheshilip qoıǵan. Halyqtyń sózin sóıleımin dep júrgender sózderinde turmaıdy. Osylaı urandatyp júrgenderdiń biri – Rınat edi. Aıaǵy ne boldy... Bir suhbatynda "Toqaevtyń oq atýǵa buıryq bergeni durys boldy. Amaly bolǵan joq" dep aıtypty. Deni durys pa? Meniń Rınatqa aıtar sózim joq, – dedi ol. 

Aıdos Meldehan Qańtar qyrǵynyn umytyp bara jatqan halyqqa da ókpeli ekenin aıtty. Jańaózen oqıǵasy men Qańtardy baılanystyra kele mundaı oqıǵanyń taǵy da qaıtalanýy múmkin ekenin aıtty. 

– Alǵashynda meni Dýlat Aǵadildiń taǵdyryn qaıtalaısyń dep qorqytty. Dýlat Aǵadildiń taǵdyryn qaıtalaýdan qoryqpaımyn. Ol naǵyz eldiń qamyn oılaǵan azamat edi. О́lsem artymda ádilet izdeıtin bala-shaǵam bar. Shyndyq izdegendi atyp tastaıdy dep qoryqpańyzdar. Ádilet áıteýir bir kúni ornaıdy, – dedi Aıdos Meldehan. 

Aıym Nursapa

Avtormen onyń Facebook paraqshasy arqyly habarlasýǵa bolady.

Jazylyńyz

"Qamshy" silteıdi

Qate tapsańyz, qajetti bólikti tańdap ctrl+enter basyńyz.

Pikir qaldyrý

pikir