«Qupııa toı»: qazaqtyń 140 baıy bas qosty (vıdeo)

Almatynyń tórinde elimizdiń eń beldi kásipkerleri bas qosty, dep habarlaıdy Qamshy.kz aqparat agenttigi.

Sharanyń ótýi teginnen emes. Maqsat – túrli salada kásiptiń tasyn domalatyp júrgen azamattardy biriktirý, ózinshe bıznes-orta uıymdastyrý.

«Búgin Allanyń qalaýymen elimizdegi ár qaladaǵy kásipkerlerdiń basyn qosyp, dastarhan jaıdyq. Bireýdiń satatyn zaty bar, bireýdiń zaýyty bar. Ár-qaısysy bir-birin tanyp, Sovet úkimetinde kooperatıv boldy ǵoı, sol sııaqty, birigip jumys istese, biz óse alamyz. Sol úshin bizdiń maqsat olardy bir-birimen tanystyrý», – deıdi kásipker Bahtııar О́serbekuly.

Aıtýly sharaǵa 100 túrli salanyń basyn ustaǵan 140-taı kásipker kelgen. Árbiri - 300-deı adamǵa jumys berýshi. Búginde olar Qazaqstannyń ǵana emes, TMD naryǵyn túgel qamtyp otyr. Iаǵnı, óz isiniń ozyqtary.

«Men bıznes-týr uıymdastyryp júrgendikten qazir jańa múmkindikter izdeımin. Mysaly, taǵy kimderdi aparsam bolady, olardy qalaı biriktirsem bolady degen sekildi. Bul jerge kelgen ár adam, óziniń izdegenin tabady dep oılaımyn. Qazaqta kóp máseleler sháı ústinde, adal astyń ústinde sheshiledi ǵoı. Sondyqtan kásipkerlerdiń osylaı bir ortaǵa jınalǵany, meni qýantyp otyr. О́ıtkeni buryn alypsatar, kommersant dep bastary birikpedi nemese olardy biriktirmegender boldy. Al qazir mine kásipkerler osyndaı orta quryp jatqandaryna men rızamyn», – dep qosty kásipker О́rken Qojahmet.

Bul bıznes ortaǵa qosylýdyń ózindik talaptary bar. Bastysy – adal bıznes júrgizý, deıdi ıgilerdiń basyn qosqan kásipker Áset Jumaqulov.

«Bundaı ıventter bizde jylyna 4-5 ret ótedi. Jınalǵan adam sany 150 men 350-diń arasy. Erkin formatta, eshqandaı maskasyz, barlyǵy qarapaıym. Bizdiń talap ol adamnyń bıznesi taza bolý kerek. Halal deıdi ǵoı. Ekinshisi, bireýge jamandyq jasamaǵan bolýy tıis. Úshinshisi, jumysshylarynyń qamyn oılaıtyn adam bolý kerek. Tórtinshisi, biz onyń qandaı áriptestik qarym-qatynasta bolǵanyn surastyryp bilemiz. Sosyn bizdiń ortamyzǵa qosylý úshin onyń tabysy aıyna 10 mln. bolýy kerek», – dep túsindirdi ol.

Bul – dostyq toıy, kásipkerlik orta qalyptastyrǵan qazaq jigitteriniń qaýymdastyǵy, baýyrlastyq orta. Tájirıbe almasyp, bir-birine demeý berý, bıznes ortany keńeıtý. Eli úshin eńbek etip júrgen júrekti jigitterdiń basyn qosqan ıgi shara aldaǵy ýaqytta jalǵasyn taba bermek.