Kópbalaly ana, kásipker Aqmaral Basırova: Sátsizdikten emes, bireýge qol jaıyp otyrýdan qorqý kerek

Qazir qoǵamda úı tirligimen qatar bıznesti dóńgeletip júrgen áıelderdiń sany kóbeıip keledi. Kópbalaly ana, áleýmettik kásipker Aqmaral Meńdiqaıyrqyzynyń da bıznes salasynda júrgenine 5 jyldan asqan. Ol 5 balanyń anasy. Kásipker áıel Qamshy.kz aqparat agenttigine bergen suhbatynda kásip bastaýǵa ne sebep bolǵanyn, otbasy men bıznesti qalaı qatar alyp júrgenin aıtyp berdi. 

– Aqmaral hanym, bızneske qalaı keldińiz? Qysqasha tarıhyńyzdy aıtyp berińizshi. 

– Bes bala asyraý kerek boldy. Qol qýsyryp otyra almadym. Olardy ómirge ákelgen soń qatarynan qaldyrmaı ósirgim keldi. Sondyqtan jumys talǵamaı, qolymnan kelgen isti jasadym. Birde balamnyń aıtýymen feısbýk jelisine «úı jınaımyz, esik aldyn tazalap, ákteımiz, kez kelgen jumysty jasaımyz» degen jarnama jarııaladyq. Kópshilik «Ádette kópbalaly analar kómek surap otyrýshy edi, bul kisi jumys surap jatyr» degen pikir qaldyryp, jaqsy qabyldady. Jeli qoldanýshylary óz paraqshalaryna bólisip, jumys berýshiler sany arta bastady. Biraz ýaqyt ótken soń maǵan tanymaıtyn adam habarlasyp, "kásip ashqyń kelse 1 mln teńgelik qaıtarylatyn sýbsıdııa bereıin" dedi. Usynysty birden qabyldadym. Alǵashqy ofısimdi bir úıdiń jertólesinde ashtym. "Áreketke bereket" demekshi kásibim alǵa basyp, sýbsıdııany 20 aıda qaıtardym. Osylaısha, bıznes salasyna alǵashqy qadamymdy bastym. 

– Otbasy men karerany qatar alyp júrý qıynǵa soqpady ma?

– Otbasylyq bıznes bolǵan soń bir-birimizden alshaqtamaı, únemi birge jumys istedik. Kerisinshe, ortaq maqsat otbasyny biriktiredi eken. Balalardy ósirip, tárbıeleýge áıelmen qatar erkek te mindetti. Sol sebepti ekeýmiz de otbasymyz úshin aıanbaı eńbek ettik. Kóp aqsha tabamyz dep sanasyp kórgen emespin. Únemi jıǵan-tergenimizdi ortaǵa salyp, otbasylyq bıýdjetti tıimdi túrde jaratýǵa tyrysatynbyz. Ár úıdiń óz máselesi, erejesi bolady. Erli-zaıyptylar ózara kelisim jasasyp, bir-birin tyńdaı alsa kez kelgen máseleni sheshýge bolady. 

– Otbasyly áıeldiń jeke qarajatynyń bolýy qanshalyqty mańyzdy? 

– Áıel zatynyń kishigirim bolsa da turaqty tabysy bolýy kerek. Eger onyń jeke kirisi bolsa kúıeýiniń qolyna qarap qalady. Qazir kóp áıel barar jeri men turaqty tabysy bolmaǵandyqtan kúıeýiniń uryp-soǵýyna kónip otyr. Árıne, barlyq erkekke topyraq shasha almaımyn. Biraq bul – qazirgi qoǵamnyń shyndyǵy. 

– Mansap pen otbasyn qatar alyp júrýge qorqatyn áıelderge qandaı keńes beresiz?

– Asyrap, jetildirý kerek bala bolsa qorqynyshtyń bárin ysyryp tastaǵan jón. Dúnıege kelgen ár bala úshin ata-ana jaýapty. Qorqynysh adamdy tek tejeıdi. Sátsizdikten emes, bireýge qol jaıyp otyrýdan qorqý kerek. Al eki qolǵa bir kúrek tabylady.