Mańǵystaýda tótenshe jaǵdaılardyń aldyn alý máseleleri talqylandy

6 aqpanda óńir basshysy Nurlan Noǵaevtyń tóraǵalyǵymen tótenshe jaǵdaılardyń aldyn alý jáne ony joıý jónindegi komıssııanyń otyrysy ótti, - dep habarlaıdy Mańǵystaý oblysy ákiminiń baspasóz qyzmeti.

Otyrysta tótenshe jaǵdaılardyń aldyn alý jáne joıý jónindegi komıssııanyń 2022 jyly atqarǵan jumysy, avtomobıl jáne temirjoldy sý basý qaýpiniń aldyn alý boıynsha jergilikti atqarýshy organdardyń daıyndyǵy talqylandy. Sondaı-aq sý ótkizý qurylysyn, drenaj júıelerin daıyndaý jáne "Saryqabaq" gıdrotehnıkalyq qurylysyn kúrdeli jóndeýge qarjy bólý máseleleri sóz boldy.

Mańǵystaý oblysy Tótenshe jaǵdaılar departamentiniń basshysy Murat Muhanovtyń aıtýynsha, oblys ortalyǵyndaǵy joǵarǵy shaǵynaýdandardaǵy órt sóndirý gıdranttarynyń aqaýyn joıý josparlanǵan. Alaıda, bul jumystar áli júrgizilmeı otyr. Sonymen qatar osy ýaqytqa deıin Beıneý aýdanyndaǵy tozyǵy jetken kópqabatty úıler men Aqtaý qalasyndaǵy galereıa úıler jóndeýden ótpegen.

Aımaq basshysy Nurlan Noǵaev atalǵan jumystardy jedeldetýdi jáne jaýapty mamandarǵa alǵa qoıǵan mindetterdiń oryndalýyn baqylaýdy tapsyrdy.

Sondaı-aq oblystyq jáne respýblıkalyq mańyzy bar joldar men eldi mekenderdi sý tasqynynan qorǵaý qajettigin aıtty.

- Aqtaý qalasynda qatty jańbyr jaýsa, úılerdi sý basyp ketý qaýpi bar. Jyl saıyn qaıtalanatyn bul máseleni sheshýdiń joly joq pa? Ár jaýǵan qatty jańbyrdan keıin sý arnaıy sorǵymen tazartylady. Qajetti jaǵdaı jasaý úshin qolda bar múmkindikti nege paıdalanbasqa? Bul máseleni aýdan, qala ákimderine baqylaýǵa alýdy tapsyramyn. Qajetti sharalar der kezinde qolǵa alynsa, artyq shyǵyn da bolmaıdy, - dedi Nurlan Noǵaev.

Sondaı-aq jıynda óńirdiń seısmıkalyq qaýiptiligin zamanaýı ǵylymı-ádistemelik zertteý máseleleri talqylandy.