Bas prokýratýra Jusan tobyn Nazarbaevqa qaıtaryp bermek pe?

 

Málimdemede bas prokýratýra kapıtaldy jymqyrý jáne shet elge shyǵarý faktilerin anyqtaý úshin bank sektorynda taldaý júrgizgeni aıtylady.

 

"Taldaý barysynda "Jusan" tobynyń aktıvterin basqarý qurylymyn ózgertýdiń kóleńkeli shemasy anyqtalǵan. Bul shemany júzege asyrý nátıjesinde toptyń qyzmetin baqylaý quzireti shetelde tirkelgen uıymdarǵa óteýsiz berilgen. Atap aıtqanda, 2020 jylǵy 27 sáýirde Jusan tobynyń ıesi "Pioneer Capital Invest" JShS qatysýshylarynyń jalpy jınalysynda Pioneer múlkin shetelde tirkelgen Jusan Technologies Ltd kompanııasynyń jarǵylyq kapıtalyna berýdi maquldaý týraly sheshim qabyldanǵan. "Bul áreketter qoǵamdyq múddege, onyń ishinde "Nazarbaev ýnıversıteti" men "Nazarbaev zııatkerlik mektepteriniń" ondaǵan myń qazaqstandyq stýdenti men oqýshylarynyń múddesine qaýip tóndirdi. Sebebi "Jusan" tobynyń aksııalary, oblıgasııalary men depozıtteri boıynsha dıvıdendteri – atalmysh oqý oryndaryn qarjylandyrý kózderiniń biri" delingeni bas prokýratýra habarlamasynda.

 

2023 jylǵy 3 aqpanda bas prokýratýraǵa "Nazarbaev qorynan" aryz túsken. Ol jerde qor birqatar sýbektiniń quqyqqa qarsy áreketteriniń saldarynan "Jusan" toby sheteldik azamattardyń baqylaýyna ótip ketkenine shaǵymdanyp, prokýrorlyq qadaǵalaý sharalaryn qabyldaýdy suraǵan.

 

"Osylaısha prokýratýra organdarynyń maqsaty – tek ádilettilikti qalpyna keltirip, "Jusan" tobynyń aktıvterin basqarýdy Qazaqstannyń quzyryna qaıtarý" dep naqtylady bas prokýratýranyń baspasóz qyzmeti.

 

Atalǵan talap-aryz Jusan Banktiń jumysyna qatysty emestigi, onyń aǵymdaǵy qyzmetine, sondaı-aq bank klıentteri men iskerlik seriktestikterimen ózara is-qımylyna shekteý qoımaıtyny atap ótildi.

 

"Istiń sotta qaralýy Jusan Banktiń jumysyna áser etpeıdi, ol qalypty jaǵdaıda jumysyn jalǵastyrady, dep sendirdi bas prokýratýra.