Almaty oblysynyń ákimi Zarechnyıdaǵy qazandyqtyń jumysyn tekserdi

Almaty oblysynyń ákimi Marat Sultanǵazıev Zarechnyı aýylyndaǵy qazandyqqa bardy. Jylý ortalyǵynyń ókilderi oblys ákimine qazandyq jumysyn mazýttan tabıǵı gazǵa aýystyrý josparlary týraly aıtyp berdi. Sondaı-aq bolashaqta suranystyń ósýine baılanysty kásiporynnyń jylý qýatyn arttyrý josparlanyp jatyr.

«Joba daıyn, saraptamadan ótti, eger kelesi jyly jańǵyrtýǵa qarjylandyrý bólinse, 2024 jyly jumystardy aıaqtaımyz», – dedi jylý ortalyq ókilderi.

Jańartýdan keıin qazandyqtardyń qýaty 9,03 Gkal/saǵ-tan 13 Gkal/saǵ-qa deıin artady. Qurylys-montajdaý jumystarynyń aldyn ala somasy 200 mln teńgeni quraıdy.
Magıstraldyq gaz jelilerin salý Zarechnyı aýyldyq okrýginiń eki aýylynda 1 myńnan astam tutynýshyny gazben qamtamasyz etýge múmkindik beredi.

О́ńir basshysy Marat Sultanǵazıev Qonaev turǵyndarymen kezdesýde atap ótkendeı, Zarechnyı aýylyndaǵy ortalyq qazandyqtyń qýatyn arttyrý boıynsha jobalyq-smetalyq qujat ázirleýge bıyl jergilikti bıýdjetten 9,9 mln. teńge bólindi.

Qazirgi ýaqytta qazandyq 35 úıdi (600-den astam páter), 224 jeke úıdi jáne 5 áleýmettik nysandy jylýmen qamtamasyz etedi. Jylý jelileriniń uzyndyǵy – 15,021 km, jylý jelileriniń tozýy 24% quraıdy.

Nysanda barlyǵy 5 qazandyq ornatylǵan. AH-300 jáne FX-300 Dual tıpti eki avtomattandyrylǵan bý qazandyǵy, jalpy ónimdiligi 0,6 tonna bý/saǵ jáne 3 vv-3500 tıpti sý jylytý qazandyǵy istep tur. Sý jylytý qazandyqtarynyń qazirgi jalpy ónimdiligi saǵatyna 9,03 Gkal quraıdy. 

Esterińizge sala ketsek, Qonaev qalasy qazandyǵy tabıǵı gazben jylytylatyn elimizdegi jalǵyz oblys ortalyǵy.