Keler jyldan bastap aıyppul men kólik salyǵynyń mólsheri artady

2023 jylǵy 1 qańtardan bastap aılyq eseptik kórsetkish mólsheri 3063 teńgeden 3450 teńgege ósetinine baılanysty, aıyppul mólsheri de artady. Kolesa.kz mamandary AEK mólsheri eń jıi ushyrasatyn aıyppuldar kólemine qalaı áser etetinin eseptep kórdi.

Mysaly, turaq aqysyn tólemegeni úshin salynatyn eń tómengi aıyppul (3 AEK) 9189 teńgeden 10 350 teńgege ósedi. Júrgizýshiler jyldamdyqty 10-20 km/saǵ asyrǵany úshin (5 AEK) endi 15 315 teńge emes, 17 250 teńge tóleıdi. Al baǵdarshamnyń qyzyl túsine ótkeni úshin salynatyn aıyppul (10 AEK ) 30 630-dan 34 500 teńgege kóteriledi.

Kólikti bastapqy tirkeý aqysynyń eń tómeni (0.25 AEK) 765.75-ten 862.5 teńgege, al eń joǵarysy (500 AEK) 1 531 500-den 1 725 000 teńgege deıin joǵarylaıdy.

Qozǵaltqysh kólemi 1000 sm³-ge deıingi jeńil kólik úshin ýtıl alymynyń mólsheri 229 725 teńgeden 258 750 teńgege, al qozǵaltqysh kólemi 3001 sm³-den joǵary jeńil mashına úshin 1 761 225 teńgeden 1 983 750 teńgege ósedi.

Qozǵaltqysh kólemi 1100 sm³-ge deıingi M1 sanatyndaǵy mashınadan alynatyn eń tómengi kólik salyǵy (1 AEK) 3063 teńgeden 3450 teńgege ósedi. Al kólemi bes lıtrden asatyn mashına úshin (200 AEK) 612 600 emes, 690 000 teńge salyq tóleýge týra keledi.

Sondaı-aq 1 qańtardan bastap saqtandyrý polısiniń quny artady, sebebi bazalyq saqtandyrý syıaqysy (1.9 AEK) 5819.7 teńgeden 6555 teńgege joǵarylaıdy.