• USD 468.56

  • EUR 497.56

  • RUB 7.3

  • CNY 67.18

29 Naýryz, 15:54:20
Almaty
+35°

Taldyqorǵan Qoǵamdyq keńesiniń kezekti otyrysynda qaladaǵy ortalyq kóshelerdiń biri Nazarbaevqa burynǵy ataýyn qaıtarý týraly másele kóterildi. Bul týraly Qoǵamdyq keńes baspasóz qyzmeti habarlady.

Qoǵamdyq keńes otyrysynyń kún tártibinde birneshe másele qaralǵan. Solardyń qatarynda Nazarbaev kóshesiniń burynǵy Táýelsizdik ataýyn qaıtarý boıynsha bastama kóterilip, Jetisý oblysynyń ákimdigi men oblystyq máslıhatqa tıisti hat joldanǵan.

Buǵan deıin Jetisý oblysynyń ákimi Beıbit Isabaevtyń jergilikti turǵyndarmen kezdesýinde belsendi azamattar qańtar oqıǵasy kezinde qulaǵan eks-prezıdent Nursultan Nazarbaev eskertkishiniń ornyna uly aqyn Abaı Qunanbaevqa arnalǵan eskertkish qoıý, Nazarbaev kóshesin qaıtadan Táýelsizdik dep ataýdy usynǵan. Ákim halyq pikiri eskeriletinin málim etken.

2019 jyly N.Nazarbaev ókiletin toqtatyp, memleket basshylyǵy Q.Toqaevqa ótken shaqta Q.Toqaev respýblıkalyq mańyzy bar qalalar men oblys ortalyqtarynyń ortalyq kósheleri men dańǵyldaryna eks-prezıdenttiń atyn berý týraly tapsyrma bergen. Taldyqorǵandaǵy Táýelsizdik kóshesi osylaı Nazarbaevqa aýystyryldy.

Al Taldyqorǵandaǵy Nazarbaev eskertkishi 2016 jyly ornatylǵan. Ony oblystyń sol kezdegi basshysy Amandyq Batalov ashqan. Al 2022 jylǵy qańtar oqıǵasy kezinde jurtshylyq eskertkishti qulatyp, soden beri ony eshkim qaıta turǵyzbady.

Qańtar oqıǵasynan keıin Nazarbaevqa erekshe ókilet bergen Tuńǵysh prezıdent týraly zań kúshin joıyp, elorda ataýy Nur-Sultannan Astanaǵa aýysty. Buryn eks-prezıdentti maqtaǵan keı adamdar qazir odan teris aınalyp, saıasatyn synap júr.

"Qamshy" silteıdi

Qate tapsańyz, qajetti bólikti tańdap ctrl+enter basyńyz.

Pikir qaldyrý

pikir