Semeıde 1200 oryndyq mektep salynady

Semeıde 1200 oryndyq mektep salynady. Abaı oblysynyń ákimi Nurlan Uranhaev pen «KAZ Minerals Management» JShS basqarma tóraǵasy Eldar Mamedov áleýmettik jobany iske asyrý máseleleri boıynsha ózara is-qımyl týraly memorandýmǵa qol qoıdy.

Memorandýmǵa sáıkes, Abaı oblysynyń ákimdigi mektep salý úshin jer telimin beredi. Qurylys aıaqtalǵannan keıin KAZ Minerals kompanııasy bilim berý obektisin ákimdiktiń kommýnaldyq menshigine ótkizedi. Qurylys quny jobalyq-smetalyq qujattamany daıyndaǵannan keıin anyqtalatyn bolady.

«Bizdiń oblysta mektep salý máselesi óte ózekti. Memleket Basshysy Qasym-Jomart Toqaev Semeı qalasyna sapary barysynda óńir mektepterinde oryn tapshylyǵy máselesin sheshýdi tapsyrdy. Búgingi tańda oblys boıynsha oryn tapshylyǵy shamamen 9 myńdy quraıdy. «Jaıly mektep» ulttyq jobasy aıasynda 2025 jylǵa deıin 11 mektep salý josparlanýda. Jańa oblysymyz úshin osyndaı mańyzdy jobalardy qoldaýǵa daıyn áleýmettik baǵdarlanǵan kompanııalardyń bolýy mańyzdy», - dep atap ótti oblys ákimi Nurlan Uranhaev.

«Kaz Minerals toby úshin bilim berý máselesi áleýmettik ınvestısııalar jáne turaqty damý salasyndaǵy basymdyqtardyń biri bolyp qala beredi. Qazirgi ýaqytta bizdiń joǵary jáne orta arnaýly oqý oryndarymen yntymaqtastyǵymyz bar. Mektep túlekterine granttar bólemiz, jas mamandardy zamanaýı kásiporyndarymyzǵa odan ári jumysqa ornalastyrý múmkindigimen taǵylymdama baǵdarlamasyn iske asyramyz. Biz úshin aımaq jastarynyń damýy mańyzdy. Mektep qurylysy bizdiń úzdiksiz bilim berý tásilimizge sáıkes keledi. Oblys mártebesin alý óńir úshin ár salada, onyń ishinde bilim salasynda da jańa perspektıvalardy ashady», - dep atap ótti «KAZ Minerals Management» basqarma tóraǵasy Eldar Mamedov.

Anyqtama úshin: 2015-2021 jyldar aralyǵynda qazirgi Abaı oblysynyń aýdandaryndaǵy áleýmettik salany qoldaý sheńberinde Kaz Minerals toby Semeı qalasynyń JMJA úı-jaılaryn, Jezkent kentiniń aýrýhanasy men mádenıet úıin, Aıagóz aýdanynyń aýdandyq aýrýhanasy úshin úı-jaılardy jóndeýdi jáne medısınalyq jabdyqtardy jetkizýdi, Semeı qalasyndaǵy balalarǵa arnalǵan ońaltý ortalyǵyna arnalǵan úı-jaılardy rekonstrýksııalaýdy, Aıagóz qalasyndaǵy sý tasqynynan keıingi qalpyna keltirý jumystaryn qarjylandyrǵan. Sonymen qatar, kompanııa kómegimen Aıagóz qalasynyń polıtehnıkalyq kolledjne arnalǵan 104 oryndyq jataqhana, sporttyq ınternattyń 200 oryndyq jatyn korpýsynyń ǵımaraty jáne Semeı qalasyndaǵy №1 BJSM ǵımaratyna qosymsha kúres zalyn jáne t.b. salyndy.