Kórneki sýret
Qazirgi kezde tumaý, JRVI órship tur. Eresekter arasynda árbir 10-shy adam aýyrsa, balalar arasynda árbir 3-shi bala aýyrady. Bul ýaqytta balalardyń aýyrǵanyna ata-analar kóńil bólý kerek. Aýrýdyń 80% jeńil túrde ótedi. Bul týraly Ortalyq kommýnıkasııalar qyzmeti alańynda "Astana medısına ýnıversıteti" AQ balalar juqpaly aýrýlary kafedrasynyń meńgerýshisi Dınagúl Baesheva málim etti.
"Buǵan qaramastan birinshi kúnnen bastap balamen birge ata-anasy úıde qalýy kerek. Ony mektepke jáne t.b. jerlerge aparmaý qajet. Sebebi ol balabaqshada, mektepte aýrýdy basqalarǵa juqtyrýy nemese ony asqyndyryp alýy múmkin. Tumaýdyń qaýipti klınıkalyq kórinisteri: temperatýra kóterilip, túspese, jótel paıda bolsa. Sondaı-aq qusý, bas aýrýy, temperatýra joǵary bolsa, bul mıdyń zaqymdanýynyń belgisi bolýy yqtımal. Sondyqtan bul jaǵdaıda balany dárigerge kórsetken jón. Balanyń daýysy ózgerip, qarlyǵyp ketse, entikpe bolsa, ol da qaýipti. Balaǵa neǵurlym erterek kóńil bólseńiz, ol soǵurlym tez jazylady" deıdi maman.
Sanıtarııalyq-epıdemıologııalyq baqylaý komıteti tóraǵasynyń orynbasary Maral Raqymjanovanyń málimetinshe, 1 qazannan bastap el boıynsha 1 mln 27 myń JRVI jaǵdaıy tirkelgen.
"Jyl saıyn qazannan bastap sáýirge deıingi aralyqta jiti respıratorlyq-vırýstyq ınfeksııalarmen (JRVI) jáne tumaýmen syrqattaný maýsymy bastalady. Dúnıejúzilik densaýlyq saqtaý uıymynyń (DDU) derekteri boıynsha aldaǵy epıdemııalyq maýsymda vırýstyń úsh shtammy ózekti bolady – A(H1N1), A(H3N2) jáne B, olar 2022/2023 epıdemııalyq maýsymǵa arnalǵan vaksınanyń quramyna engizilgen" deıdi ol.
Maral Raqymjanova qazirgi tumaý kenetten bastalyp, temperatýra kúrt joǵarylaıtynyn aıtady.
"Deneniń aıqyn ıntoksıkasııasy baıqalady, qaltyraý, adınamııa, bulshyqettiń jáne bastyń aýyrýy, deneniń syrqyraýy sııaqty belgileri bolady. Kez kelgen basqa vırýstyq ınfeksııa kezinde ádette kataraldyq belgiler basym bolady, sodan keıin osy kataraldyq belgilermen birge temperatýra paıda bolady. Adamdar kóp jınalatyn oryndarǵa, ásirese jabyq bólmelerge barýdy shekteý, bólmelerdi jeldetý, antıseptıkalyq quraldardy paıdalanyp, dezınfeksııalyq rejımdi kúsheıtý, qoldy óńdeý úshin antıseptıkterdi nemese dezınfeksııalyq sýlyqtardy paıdalaný, naýqas adamdarmen baılanysty shekteý, olardy oqshaýlaý, aýyrǵandardyń 80%-y balalar ekenin eskere otyryp, tumaý men JRVI belgileri paıda bolǵan kezde balalardy úıde qaldyryp, uıymdasqan ujymdarǵa jibermeý kerek. Sondaı-aq medısınalyq kómekke ýaqytyly júginý kerek" dedi maman.
Qate tapsańyz, qajetti bólikti tańdap ctrl+enter basyńyz.
Pikir qaldyrý
pikir