Semeı turǵyny aqyl-esi kem jas jigitti 12 jyl boıy qul retinde paıdalanyp, yqysyn jep kelgen

Abaı oblysynda Tarbaǵataı aýdanynda týǵan 26 jastaǵy er adam 12 jyl boıy quldyqta ómir súrip kelgen. Ol osy ýaqyt aralyǵynda 11 sharýashylyqta jumys istegen. Bul týraly Ishki ister mınıstrliginiń aqparat resýrsy habarlady.

Jarma aýdany Shar qalasy polısııa basqarmasyna sharýa qojalyqtardyń biriniń basshysy qońyraý shalyp, jańa jumysshy jaldaǵanyn aıtqan. Polısııa qyzmetkerleri jumysqa jaldanǵan azamattyń qujaty joǵyn anyqtap, qoıylǵan suraqqa durys jaýap bere almaıtynyn baıqaǵan. Sharýaqojalyq ıesi jańa jumysshysynyń qasynan ketkende polıseıler onyń tegin bilip alyp, sol boıynsha onyń ápkesin tabady. Artynsha, ápkesi er adamdy 2010 jyldan beri tappaı júrgeni, jábirlenýshi osy 12 jylda 11 sharýa qojalyǵynda jumysqa jegilgeni anyqtalǵan.

Tergeý barysynda psıhıkalyq aýytqýy bar jas jigitti buryn birneshe ret sottalǵan 54 jastaǵy Semeı turǵyny jumys kúshi retinde paıdalanyp kelgeni belgili boldy. Ol Tarbaǵataı aýdanynyń turǵynymen Tuǵyl aýylyna balyq aýlaýǵa barǵanda tanysqan. Jas jigittiń aqyl-esi kem ekenin baıqap, óziniń jymysqy oıyn júzege asyrǵan.

Ol jábirlenýshini 12 jyldan astam ýaqyt boıy Semeı qalasy, Abaı, Ulan jáne Jarma aýdandaryndaǵy sharýa qojalyqtarynda jumys isteý úshin satyp kelgen. О́zin sharýaqojalyq ıelerine jigittiń týysymyn dep tanystyrǵan. Jigittiń jalaqyn ózi alyp, jyldar boıy osylaısha 2 mıllıon teńge aqshany qaltasyna basqan. Budan bólek múgedektiń aı saıynǵy zeınetaqy jınaqtary men áleýmettik tólemderin jymqyryp otyrǵan. Zalaldyń jalpy somasy 4 mln teńgeden asady.

Qazirgi ýaqytta jábirlenýshi týystaryna tabystalǵan. Al kúdiktini Jarma aýdandyq soty qylmystyq kodekstiń 128-baby 2-bóligi 2, 8, 11, 12-bólekteri (Adam saýdasy) jáne 190-baptyń 1-tarmaǵy 3-bóligi (Alaıaqtyq) boıynsha kináli dep taýyp, 4 jyl 6 aıǵa bas bostandyǵynan aıyrǵan.