"Qyzyl jalaý kóterdi": Iran Saýd Arabııasyna shabýyl jasamaqshy

Saýd Arabııasynyń bıligi Irannyń yqtımaldy shabýyly týraly barlaý qyzmetteriniń aqparatyn AQSh-qa tapsyrdy.  Endi Taıaý Shyǵystaǵy amerıkalyq jáne basqa da kúshter shabýyldy toıtarýǵa daıyndalyp jatyr, dep habarlady The Wall Street Journal.h basylymy.

Saýd Arabııasy bıliginiń habarlaýynsha, Iran bıligi elde bolyp jatqan jappaı narazylyqtardan nazardy basqa jaqqa aýdarý úshin osyndaı áreketke barmaq. Qyrkúıek aıynda memlekettik kıim úlgisin buzǵan 22 jastaǵy ırandyq boıjetken Mahsa Amını polısııa azaptaýynan qaza tapqan. Bul el ishinde halyq narazylyǵyn týdyrǵan. Narazylyqty basý kezinde Iran polısııasy qarý qoldanyp, 200-den astam adam qaza bolǵan, myńnan astam adam ustalǵan.

Al Iran bıligi buǵan deıin Saýd Arabııasy, AQSh jáne Izraıldi buqaralyq aqparat quraldary arqyly narazylyq týdyrýǵa jáne el saıasatyna aralasty dep ashyq túrde aıyptaǵan bolatyn. 

"Bul bizdiń sońǵy eskertýimiz, óıtkeni sender bizdiń ishki isimizge BAQ arqyly aralasyp otyrsyńdar" degen Irannyń korpýs qolbasshysy, general-maıor Hosseın Salamı.

"Qazir Saýd Arabııasy, AQSh jáne taǵy birneshe kórshiles memleketter qarýly kúshteriniń daıyndyǵyn arttyrdy. Saýd Arabııasy men AQSh sheneýnikteriniń málimdemeleri boıynsha, Iran tek Saýd Arabııasyna ǵana emes, Iraktyń Erbıl qalasyna da shabýyl jasaýǵa daıyndalyp jatyr", dep jazǵan basylym. 

Iran bıligi Qum qalasyndaǵy meshittiń ústine qyzyl jalaý kóterdi. Bul kektiń, jazanyń belgisi bolyp sanalady. Qyzyl jalaý sońǵy ret 2020 jyly Irannyń bas qolbasshysy  Kasem Súleımanıdiń qazasy kezinde kóterilgen.