Ekologııa mınıstri shyǵysqazaqstandyqtardy tabıǵı baılyqtarǵa uqypty qaraýǵa shaqyrdy

Shyǵys Qazaqstan óziniń tabıǵı baılyqtarymen jáne tabıǵaty kóz tartar shuraıly jerlerimen, demalatyn týrıstik aımaqtarymen áıgili ólke. Alaıda, stıhııalyq qoqystar men tabıǵı resýrstarǵa uqypsyz qaraý máselesi osy kúnge deıin ózekti bolyp, qorshaǵan ortaǵa keri áserin tıgizýde.

«Qurmetti kezdesýge qatysýshylar, osy alańdy paıdalana otyryp, kelesini aıtqym keledi. Sizdiń óńirińiz tabıǵı baılyqtarymen, ásem jerlerimen áıgili. Bul Katonqaraǵaı ulttyq parki, Marqakól kóli jáne basqa da jerler. Osynaý sulýlyqty kórýge sizderge kóptegen týrıster keletinin jaqsy bilemiz. Bizdiń biregeı tabıǵı baılyqtarymyzǵa uqypty qaraýǵa, qoqys tastamaýǵa, órt qaýipsizdigin saqtaýǵa shaqyramyn. Bolashaq urpaq úshin tabıǵı sulýlyqty qurmettep, saqtaý kerek» dedi ekologııa, geologııa jáne tabıǵı resýrstar mınıstri Serikqalı Brekeshev ShQO jurtshylyǵymen kezdesý barysynda.

Mınıstr óńirdiń tabıǵı resýrstary týraly aıta kele, sý sharýashylyǵy obektileriniń tozýy jáne sýdyń úlken shyǵyny jaıly sózge tıek etti. Atalǵan máselege  baılanysty, qazir sý ınfraqurylymyn qaıta jańartý, sýarý arnalaryn sıfrlandyrý júrgizilýde.

«2017 jyldyń basynda elimizde 41 avarııalyq sý qoımasy boldy. Sońǵy 5 jylda (2017-2021) 16-sy jóndeldi.  Bıyl taǵy 6 qurylys qalpyna keltiriledi, al 2025 jylǵa deıin taǵy 19 sý qoımasyn jańartý josparlanýda, onyń ishinde 2023 jyldyń sońyna deıin Shyǵys Qazaqstan oblysyndaǵy 2 apatty sý qoımasyn jóndeý josparlanýda. Bul Zaısan aýdanyndaǵy «Úıdene» sý qoımasyn salý jáne Tarbaǵataı aýdanyndaǵy Qarǵyba ózenindegi bógetti qaıta jóndeý jumystary. Nátıjesinde 3 eldi mekendi sý basý qaýpi tómendeıdi jáne sýarmaly jerlerdiń aýdany 13 myń gektarǵa ulǵaıady. Memleket basshysynyń tapsyrmasy boıynsha sý zańnamasyn jetildirý boıynsha jumys júrgizip jatyrmyz. Jańa Sý kodeksiniń jáne ilespe zań jobasynyń tujyrymdamalary ázirlendi, olar talqylaý úshin Ashyq NQA portalynda ornalastyrylǵan. Sý zańnamasyn jetildirý boıynsha usynystaryńyz bar ma, olardy bizge jibere alasyz", - dep tolyqtyrdy mınıstr.