4 jyl ishinde "Samruk-Kazyna Trust" ShQO 1 mıllıard teńgeniń jobasyn ınvestısııalady

2022 jylǵy 15 maýsymda "Samruk-Kazyna Trust" áleýmettik jobalardy damytý qorynyń qyzmetkerleri úkimettik emes uıymdardyń ókilderimen, jýrnalıstermen, belsendilermen, jastarmen jáne Shyǵys Qazaqstan oblysy ákimdiginiń qyzmetkerlerimen kezdesti.

"Samruk-Kazyna Trust" qory-Qazaqstandaǵy qaıyrymdylyq salasyndaǵy iri donorlardyń biri. Qor jobalardy elimizdiń barlyq óńirlerinde júzege asyrady. О́skemen qalasyndaǵy kezdesý jergilikti Úkimettik emes uıym ókilderin ózara birlese jumys atqarýǵa, yntymaqtastyqty arttyrýǵa baǵyttalyp otyr.

Úkimettik emes uıymdar qoǵamnyń áleýmettik máselelerin sheshetin óz jobalaryna bastamashy bola alady, al qor turaqty, júıeli túrde qoldaýǵa árkez daıyn ekenin jetkizdi.

«Biz bul kezdesýdi óńirlik Úkimettik emes uıymǵa jańa áleýmettik jobalardy usynýǵa yntalandyrý úshin ótkizýdi uıǵardyq. Biz eldiń eń shalǵaı jerlerindegi adamdardyń ómirin jaqsartý týraly qyzyqty ıdeıalardy kútemiz. Bizdiń qor azamattyq sektordy óziniń shaǵyn bastamalaryn keńeıtýge shabyttandyrýǵa tyrysady. Mysaly, shaǵyn qalanyń bastamalary búkil oblys úshin, tipti búkil el úshin ıgi is bolýy múmkin. Biz Shyǵys Qazaqstan oblysynyń belsendi ÚEU-yn yntymaqtastyqqa shaqyramyz» dedi "Samruk-Kazyna Trust" Bas dırektorynyń orynbasary Serǵoja Qalıasqarov.

Kezdesýge qatysqan ÚEU ókilderi qazirdiń ózinde iske asyp jatqan jobalar týraly aıtyp ótti. 4 jyl ishinde "Samruk-Kazyna Trust" ShQO-da jalpy sommasy 1 mlrd teńgege 13 áleýmettik joba iske asyrypty. Máselen oblysta 6 ámbebap balalar sport alańyn ornatty, О́skemen qalasy № 8 orta mektep bazasynda ınklıýzıvti bilim berýdiń Resýrstyq ortalyǵyn ashty, «Qamqorlyq» jobasy aıasynda О́skemen qalasynyń «Ana men bala ortalyǵy» bazasynda damýynda erekshelikteri bar balalarǵa arnalǵan ońaltý ortalyǵyn jóndep, jabdyqtady, sondaı-aq 4 ókpeni jasandy jeldetý apparaty, 30 konsentrator jáne 60 pýlsoksımetr, 5 sanıtarlyq mashınany qor qarjysyna alyp bergen eken.

Qazir qor óńirdi damytý boıynsha jańa bastamalarǵa ázir ekenin atalǵan kezdesýde málimdep ótti. Demek úkimettik emes uıym ókilderi, "Samruk-Kazyna Trust" áleýmettik jobalaryna qatysý úshin, ózderiniń ótinimderin www.sk-trust.kz. «Seriktes bolý» bólimine jiberýge jáne qordyń call-ortalyǵyna +7 (7172) 57-68-98 kórsetilgen nomer arqyly  habarlasyp,  tolyq aqparat alýǵa bolady.