Halyqtan kómegimen 23 otbasyǵa úı syılaǵan Rysbala Ikrambaı: Elimizde úısiz-kúısiz qazaq qalmasa eken dep tileımiz

Bloger Rysbala Ikrambaı sońǵy bir jylda turmysy tómen, jaǵdaıy múshkil 23 otbasynyń baspanaly bolýyna kómektesken belsendi bloger. Instagramdaǵy oqyrmandaryn jaqsylyq jasaýǵa jumyldyrǵan Rysbala búginde qustyń uıasyndaı aıadaı ǵana bólmeni panalap kelgen osynshama otbasyn óz baspanasyna kirgizdi. Halyq jınaǵan qarajatqa Almatynyń mańaıynan úı satyp alyp qana qoımaı, Rysbala kásipker kúıeýi men demeýshilerdiń qoldaýynyń arqasynda satyp alynǵan úıdiń ishine jóndeý júrgizip, tósek-oryn, ydys-aıaǵy, jıhazyna deıin bútindep beredi eken. Blogerdiń osyndaı qaıyrymdy isiózgelerge úlgi bolar degen maqsatta Qamshy portaly Rysbala Ikrambaıdan suhbat aldy.

– Rysbala hanym, qaıyrymdy isterińizdiń barysy, ol qalaı júzege asatyny týraly aıtyp berińizshi

– Buryndary ánshi-aqyndarǵa eliktep óstik, gazet-jýrnaldarǵa shyqqan suhbattaryn oqıtynbyz. Únemi teledıdardan kórip, qyzyǵatyn-ek. Sol kezde ustazdarymyz «2000 jyly ánshilerdiń aýzy aqqa tıdi» dep aıtýshy edi. Sol sekildi blogerlik te qazir kópke belgili kásiptiń biri. Kópshiligi basqalarǵa paıdaly bolý úshin, endi biri jaı ǵana hobbı úshin blogerlikpen aınalysady. Sol sanattyń qatarynda ózim de barmyn. Áleýmettik jelide paraqshamdy júrgizip kele jatqanyma biraz ýaqyt boldy. Al joldasym jeke kásippen aınalysady. Degenmen, onyń jumysyna men aralasa bermeımin. О́ıtkeni bıznes tilin múldem túsinbeımin. Qaıyrymdylyqqa qarajatty qaıyrymdy oqyrmandarym jınap beredi. Budan bólek muqtaj jandarǵa kómek kórsetip, úıine kerekti jıhazdardy alyp berýge qoldaý bildiretin arnaıy demeýshilerimiz bar. Bıznestiń aınalasynda júrgen aǵa-ápkelerimiz biz atqaryp jatqan jumystardy únemi baqylap, qarap otyrady. О́zimiz de jumystyń esebin soqyrǵa taıaq ustatqan etip, búge-shúgesine deıin kórsetip te jatyrmyz. Sol sebepti demeýshilerimiz bizge tolyqtaı senim artady. Búginge deıin sol demeýshilerdiń kómegimen balalardyń kompıýterin, bireýdiń ydys-aıaǵyn, endi biriniń perdesi men jıhazyn alyp berdik.

– Qaıyrymdylyqqa muqtaj jandardy qalaı tabasyzdar? Qandaı sharttar boıynsha irikteısizder?

– Qaıyrymdylyq úshin qarajat oqyrmandarymnyń arasynan jınalatyndyqtan, oqyrmandarymnyń ózderi «osy adamǵa kómek berińizdershi», dep jazyp jatady. Mysaly, oqyrmandarym 10 adamnyń aqparatyn jiberdi delik. Sol 10 adamnyń jeke málimetin jazyp alyp, báriniń úıine kirip, jaǵdaıyn bilip qaıtamyz. Biraq barǵan kezde birden «Biz sizge úı alyp berip, taý qoparyp, tas jaramyz dep kelmedik. Sizdiń jaǵdaıyńyzdy bilip keteıik degen oımen keldik» dep birden aıtamyz. Biraq barynsha azyq-túlik, kerek bolady degen birneshe zattardy aparamyz. Jaǵdaıyn kózben kórip, bilip alǵannan keıin arasynan shyn muqtaj degenerdi anyqtaımyz.

Bizde kezekke qoıý degen bolmaıdy, ózimiz de izdep jatpaımyz. Halyq ózi muqtaj jandy taýyp beredi, halyq qarajatty jınap, úıdi alyp beredi. Kóbine kópbalaly analar men jartylaı jetim balalarǵa kómek kórsetip jatyrmyz.  

– Búginge deıin qaıyrymdylyq jasaý kezinde qıyndyqqa tap bolǵan kezderińiz boldy ma?

– Alǵashynda úı alý kezinde qujat rásimdeýde qıyndyqtar kezdesti. Biraq «kóre-kóre kósem bolasyń» demekshi bir ret jibergen qatelikterimizden sabaq alyp, qaıtalamaýǵa tyrysamyz. Qazir qıyndyq joqtyń qasy desek te bolady. Kerisinshe, basymyzǵa is tússe, halyqtyń ózi kelip járdemdesip jatady.

Birde kóligimiz eski bolǵandyqtan jolda buzylyp qalatyn kezder bolǵan. Sol kezde jolaı ketip bara jatqan adamdar bizdi tanyp, qalaǵa deıin jetip alýymyzǵa kómektesken edi. Osyǵan uqsas jaıttar óte jıi bolyp turady. Tipti, qazir notarıýstaǵy adamdarǵa deıin bizdi tanyp alǵan. Qujat jınaý kezinde qatelikter bolsa aıtyp, túsindiretinder kóp. Úı izdep sharshap júrgen kezde de sýyn berip, nanyn usynyp, izgi tilekterimen oramalyn jaýyp jatatyn oqyrmandarym kezdesken kezde árıne, dán rıza bolyp qalamyz. Bul – halyqtyń jaqsylyq jasaýǵa degen yntasy, meıirimi dep bilemin. Munyń ózi úlken jeńis, jetistik. Dál osyndaı qarqynmen biz áli talaı adamnyń qıyndyǵyn jeńildetemiz degen oıdamyn.

– Internet-alaıaqtar jumystaryńyzǵa jıi kedergi keltire me? Sizderdiń attaryńyzdy paıdalanyp, alaıaqtyq áreketke barǵandardyń ústinen polısııaǵa júgindińizder me?

– Iá, ınternet-alaıaqtar jumysymyzǵa jıi kedergi keltirip jatady. Áleýmettik jelide «Yrysbala Ikrambaıdyń atynan bir baspana syılaımyz» degen mátinde jalǵan aqparat taratatyndar da kóbeıdi. Olardyń «kezek úshin aldyn ala aqsha tóleý kerek» dep jazǵandaryna senip qalatyndar bar. Negizi alaıaqtyq jasaıtyndardy tekserip qaraǵan kezde olar úıde otyrǵan analar nemese jas kelinshekter ekenin bildik. Olardyń sońyna túsip, polısııaǵa aryz jazyp, jazalanǵanyn qalaısyń. Alaıda onsyz da az qazaqpyz, bir-birimizdiń ústimizden  aryz jazyp, tar qapasqa qamaı bersek bolashaǵymyz ne bolady dep te oılaımyn. Bir jaǵynan, olar halyqtyń mańdaı terimen taýyp otyrǵan, sońǵy tıynyn alaıaqtyqpen, aram jolmen alyp qoıyp jatsa, arty jaman bola ma degen de oı keledi.. Dál osy, alaıaqtyqqa qatysty meniń oıym san-saqta júr, naqty sheshim qabyldaı almadym. Degenmen, basqalardyń aldanyp qalmasy úshin, ózimniń resmı paraqshamdy kórsetkim keledi – @irisbala__ikrambai_official. 572 myń qaıyrymdy oqyrmanym bar. Osy yrysty armııamnyń arqasynda osynshama otbasynyń úıli bolýyna járdem jasaı aldyq. Sondyqtan alaıaqtar ashqan basqa paraqshalarǵa ańǵal qazaǵym aldanyp qalmasa eken deımin.

– Nebári bir-aq jyldyń ishinde oqyrmandaryńyzben birge 23 otbasyǵa úı áperdińizder. Qansha balaǵa qýanysh syıladyńyzdar?

– Bir jyl ishinde 23 otbasy úıli boldy. Onyń ishinde 104 bala bar. Olardyń da jaǵdaıy jasalyp, qajettilikterin alyp berdik. Jaqyn arada 24-shi baspananyń kilti tabystalady. Ol úıde 7 bala bar. Negizi kómek kórsetkenderdiń kóbi mektep jasyndaǵy balalar. Arasynda biren-saran kolledj ben ýnıversıtet stýdentteri de bar.

– Esińizden ketpeıtin, sizge aýyr jaǵdaıy qatty áser etken qaı otbasy?

– 23 otbasynyń árqaısysynyń esigin alǵash qaqqan kúni qıyndyǵyn aıtyp otyryp, kózderine jas alǵan kezderin de, keıin jańa baspanaǵa kirip, qýanyshtan jylaǵan sátterin de umytpadym. Buryn jaqyndarym men týys-týǵandarymnyń amandyǵyn tileıtinmin. Endi búginge deıin qol ushyn sozǵan 23 otbasy da meniń jaqynymdaı bolyp ketti. Qazir sol 23 otbasynyń amandyǵyn tilep otyramyn.

– Ol kisilerdiń qazirgi ómiri týraly aıtyp berińizshi?

– Báriniń jaǵdaıy alǵashynda qıyn boldy. Qazir báriniń eńsesi tiktelip, ómirge degen kózqarasy ózgerip, ómir súrýge degen qulshynysy oıandy desem de bolady. Bári bir-birimen aralas-quralas, týys  bolyp júrgenin kórgen kezde qatty qýanamyn. Qazir, Allaǵa shúkir! Eń úlken baqyt – 23-shi otbasynyń baspanaly bolýy. Úlken bir qıyndyǵy sheshilip, moıyndarynan aýyr júk túskendeı bolyp otyr. Báriniń júzinde kúlki, bir-birin baýyryndaı syılap, aralas-quralas bolyp, qýanyshtaryn bólisip júr. Olardyń arasynda synap-mineıtin adam joq. Sebebi bári birdeı taǵdyrlas jandar. Sol úshin de qýanyshtymyn.  

– Aldaǵy josparlaryńyz qandaı?

– Bizde bir bes balaly otbasy bolǵan. Sol úıdiń anasy túnde kishkentaıyn qasyna alyp uıyqtap, sol kúıi oıanbaı, ómirden ótti. Osyny kórgennen keıin aldaǵy kúnge jospar qoıýǵa da qorqasyń. «Bireýdi kórip pikir etesiń, bireýdi kórip shúkir etesiń» deıdi ǵoı. Sol sebepti osy kúnimizge de shúkir etip júrmiz. Aldaǵy ýaqytta da osy joldan taımaı, halyqtyń qoldaýymen ıgi isterdiń basy-qasynda júrip, jumystarymyzdy jalǵastyrsaq deımiz. Elimiz tynysh bolsa deımiz. Elimizde úı-kúısiz júrgen qazaq qalmasa eken dep tileımiz.

 

 

 

Posmotret etý pýblıkasııý v Instagram

 

 

 

Pýblıkasııa ot Ikrambaı Rysbala Meıramhanqyzy (@irisbala__ikrambai_official)

– Jalpy Qazaqstanda sońǵy jyldary qaıyrymdylyqpen aınalysyp jatqandardyń sany kóbeıip keledi? Buǵan ne sebep dep oılaısyz?

– Bul úrdistiń kóbeıgenine men qatty qýanamyn. Aldaǵy ýaqytta da kóbeıse eken dep tileımin. Qaıyrymdylyq jumystarynyń kóbeıýiniń basty sebebi – qazaqtyń bir-birine degen meıirimi. Ekinshi sebep – áleýmettik jeli. Buryn muń-muqtajyn aıtyp, qıyndyǵymen bólisetin qural bolmady. Al, áleýmettik jeli muqtaj jandar men halyq arasyndaǵy altyn kópir boldy dep esepteımin. «Aýrýyn jasyrǵan óledi» dep qazaq tegin aıtpaǵan ǵoı. Buǵan deıin belgili sebeptermen muqtaj jandar el aldyna shyǵa almady. Qazir halyq «bir qazaq bolsa da baspanaly bolsyn» degen oımen qol ushyn sozyp jatyr. Osylaısha, bir otbasynyń qıyndyǵy sheshilip, úıli bolýda. Munyń bári halyqtyń bir-birine degen meıirimdiligi men janashyrlyǵynyń kórinisi.

– Suhbatyńyzǵa rahmet!