Nazarbaev áýletiniń Shveısarııa bankindegi shottary týraly derekter jarııalandy

Sybaılas jemqorlyq pen uıymdasqan qylmysty zertteýdiń halyqaralyq ortalyǵy (OCCRP) eks-prezıdent Nursultan Nazarbaev otbasy músheleriniń Shveısarııa bankindegi shottary týraly habarlady. Aqparat KazTAG saıtynda jarııalandy.

"Credit Suisse bankinen jylystaǵan derekterde Shveısarııa bankinen shot ashqan ondaǵan jemqor sheneýnik, qylmysker jáne adam quqyqtaryn buzýshylar týraly aqparat bar. Aqshany Shveısarııa bankinde saqtaýdyń esh sóketi joq. Onyń ústine bankter aqshany zańsyz jolmen tapqan klıenttermen jumys istemeıdi degen túsinik bar. (Biraq) Credit Suisse birneshe jyldar boıy kúmándi tulǵalarǵa qyzmet kórsetip kelgen. Olardyń rýpýtasııasyn Google-dan izdeý arqyly tekserý qıyn emes. Biraq keıbir shottar quqyq qorǵaý organdarynyń talaby boıynsha buǵattalǵan bolýy múmkin" delingen OCCRP zertteýinde.

Atalǵan bankte Darıǵa Nazarbaevanyń 2008-2012 jyldar aralyǵynda belsendi bolǵan alty shoty ashylǵan.

Máselen, Nazarbaeva atyndaǵy korporatıvtik shottardyń birinde 21 mln 611 myń 765 shveısar franki (21.02.22 – 23 mln 530 myń 306 dollar) qarjy bolǵan. Basqa shottarda 7 mln 048 myń 874 shveısar franki, ($7 674 623,69), 6 755 025 shveısar franki ($7 354 688,83) 36 416 shveısar franki ($39 648,76), 6 471 963 shveısar franki ($7 046 498,57) jáne 263 881 shveısar franki ($287 306,51) qarajat bolǵan.

Sondaı-aq, zertteýshiler Tımýr Qulybaevqa tıesili toǵyz shotty anyqtaǵan. Olardyń barlyǵy korporatıvtik shottar. Olardyń segizi 2006 jyldan 2014 jylǵa deıin jumys istegen. Maksımaldyq balansy 395 mln 50 myń 310 shveısar frankin ($ 430 120 111,17) quraıtyn bir shot zertteý kezinde belsendi boldy.

Qalǵan shottarda maksımaldy balans tómendegideı:

♦ 843 945 389 frank ($918 864 953,02);

♦ 187 930 frank ($204 613,11);

♦ 717 803 678 frank ($781 525 263,91);

♦ 121 637 frank ($132 435,08 );

♦ 101 825 frank ($110864,31 );

♦ 60,672 frank ($66,058,04);

♦ 65,175 frank ($70,960,78);

♦ 57,164 frank ($62,238,62).

OCCRP jeke zertteýi prezıdent Qasym-Jomart Toqaevtyń burynǵy áıeli Nadejda Toqaeva jáne olardyń uly Tımýrǵa tıesili shottar men aktıvter týraly da aqparat jarııalaǵan. Aqorda zertteýdegi derekterdi "feık" dep, prezıdentke aqparattyq shabýyl jasalyp otyr dep habarlama taratty.