Aqshuqyrda jańa sport kesheni paıdalanýǵa berildi

16 jeltoqsan – Táýelsizdik kúni qarsańynda, Túpqaraǵan aýdany, Aqshuqyr aýylynda El Táýelsizdiginiń 30 jyldyǵyna oraı 160 oryndyq dene shynyqtyrý – saýyqtyrý sport kesheni paıdalanýǵa berildi, dep habarlaıdy Túpqaraǵan aýdany ákimdiginiń baspasóz qyzmeti.  

Nysannyń saltanatty ashylý rásimine oblystyq sport basqarmasynyń basshysy Q.Jumabaev, aýyl aqsaqaldary men jas sportshylar qatysty. 

Atalǵan sport kesheninde fýtbol, voleıbol, basketbol, qazaqsha kúres, dzıýdo, boks, gımnastıka syndy sporttyń 11 túrinen úıirme ashyldy. Onda 22 kásibı jattyqtyrýshy qyzmet etetin bolady. 

Aıta ketsek, Túpqaraǵan aýdany halqynyń sportpen aınalysýy 2021 jyly 31,8%-dy qurap otyr. Halyqtyń 1000 adamǵa shaqqandaǵy sporttyq ınfraqurylymmen ortasha qamtamasyz etý 31,5 %-dy quraıdy. Sońǵy 5 jylda 2 sport kesheni qoldanysqa berilip, qazirgi tańda bıýdjet esebinen taǵy bir sport kesheniniń qurylysy júrgizilip jatyr. 

Búginde Túpqaraǵan aýdanynda 15 sport alańy, 2 tır ortalyǵy, 11 sport zal, 5 kóshe trenajerlary, 4 sport kesheni bar. Fort-Shevchenko qalasynda aýdandyq balalar men jasóspirimder sport mektebi, aýdandyq balalar men jasóspirimder sport mektebiniń Aqshuqyr aýyly fılıaly, Taýshyq aýyly sport kesheni, «Súleımen» sport kesheni salaýatty jas urpaqty tárbıeleýde.