Qazaqstandy eń damyǵan 40 eldiń qataryna qostym – N.Nazarbaev

Nursultan Nazarbaev prezıdent bolyp el basqarǵan 30 jyldaǵy óziniń tabysy týraly aıtty.

"Azat elimizdiń jastary táýelsizdikke barar joldyń qandaı azapty bolǵanyn, qandaı qurbandyqtar men synaqtar – 1916 jylǵy ult-azattyq kóterilis, azamat soǵysy, asharshylyqtyń alapat eki tolqyny, qýǵyn-súrgin men repressııalar, Uly Otan soǵysy, tyń ıgerý jyldaryndaǵy jappaı qonys aýdarýdyń zardaby arqyly jetkenimizdi bilýi kerek. Munyń ózi ótken tarıhty qasterlep, odan sabaq alý úshin qajet. Meniń "Táýelsizdik – babalar qanymen kelgen kıeli qundylyq" deıtinim osydan.

Men otyz jyl boıy halqymdy qanattyǵa qaqtyrmaı, tumsyqtyǵa shoqyttyrmaı, qaırańǵa qaldyrmaı, álemdik órkenıettiń aldyńǵy shebine, dúnıedegi eń damyǵan 40 eldiń qataryna qostym. Osy jyldar ishinde álemdik ǵylym men mádenıettiń eń úzdik jetistikterin meńgergen jańa urpaq qalyptasty. Jańa elordamyz salyndy. Eń úlken tabysym da, eń úlken baqytym da osy dep sanaımyn.

Biz, Abaı atamyz aıtqandaı, "aqyryn júrip, anyq bastyq". Sonyń arqasynda kóp salalar men baǵyttar boıynsha ózgelerden ozyp kettik" – dedi ol "Táýelsizdik taǵylymy" atty maqalasynda.