Jetisýlyq jastar kóshbasshylary anyqtaldy

Qalyptasqan dástúrge saı Tuńǵysh Prezıdent kúni qarsańynda Taldyqorǵanda oblys ákiminiń jyl saıynǵy «Kóshbasshy - 2021» jastar syılyǵyn tapsyrý saltanaty ótti. Oǵan Aqparat jáne qoǵamdyq damý mınıstriniń orynbasary Bolat Tilepov qatysty, dep habarlady Almaty oblysy ákiminiń baspasóz qyzmeti.

Saltanatty sharada sóz alǵan oblys ákiminiń orynbasary Batyrjan Baıjumanov óńirdegi jastar saıasatynyń jemisti nátıjelerin atap ótti:

- Almaty oblysynda 14 pen 29 jas aralyǵyndaǵy 400 myńdaı jas turady. Olardyń árqaısynyń boıynda jastyq jalyn, jastyq jiger bar. Búgin Tuńǵysh Prezıdent kúni qarsańynda óz salalarynda belsendiligimen, aıtýly jetistikterimen erekshelengen jastardy marapattap otyrmyz. Mundaı beleske óńirde jastar saıasatynyń ońdy júrgizilýiniń nátıjesinde jetip otyrmyz. Máselen, oblystaǵy jastardyń volonterlik uıymdarynyń qatysýymen 5 myńdaı qaıyrymdylyq sharasy ótkizildi, 38 myńdaı adamǵa áleýmettik kómek kórsetildi, volonterlardyń qoldaýynyń arqasynda 92 otbasy jańa qonysqa ıe boldy.  Bul mysaldar men sandardyń ózi-aq sóılep tur. Jetisýlyq jastar osyndaı belsendi ómir saltyn, jetistikter jolyn odan ári jalǵastyrady dep senemin. Oblys ákiminiń atynan bárińizdi marapattaryńyzben quttyqtaımyn, sáttilik pen tabys tileımin! – dedi B.Baıjumanov.

Munan soń jıyn marapattaý rásimimen jalǵasty. Kóshbasshy atanǵandar qatarynda Ilfat Abdýllın «Úzdik sportshy» dep tanyldy. Ol halyqaralyq dárejedegi sport sheberi, sadaq atýdan ulttyq quramanyń múshesi. Tokıo Olımpıadasyna qatysqan. Japonııada ótken Olımpıadada jeke birinshilikte 64 qatysýshynyń ishinen 9-shy orynǵa taban tiredi. Bul - Qazaqstannyń táýelsizdik jyldary tarıhyndaǵy úzdik nátıje.

Aıtýly jetistikterimen daralanǵandar qatarynda «Úzdik stýdent» atanǵan Darııa Ilııas ta bar. Ol «Elbasy medali» jobasynyń qola medal ıegeri. Taldyqorǵan Agrotehnıkalyq kolledjinde oqıdy, elimizdiń Úzdik stýdentteri akademııasynyń múshesi.

«Úzdik jas ádebıetshi» atanǵan Asyl Sultanǵazy – «Aq qaýyrsyn» ádebı baıqaýynyń laýreaty, «Tul dúnıe» óleńder jınaǵynyń avtory, respýblıkalyq, oblystyq ádebı baıqaýlardyń birneshe dúrkin jeńimpazy.

Al jas kásipkerler arasynda Janat Tátibaev úzdik dep tanyldy. Ol Jastar jyly aıasynda 3 mln. teńge kólemindegi granttyń ıegeri bolǵan, qazir qus fabrıkasyn ashýǵa daıyndyq júrgizip jatyr, «Balapan» baǵdarlamasymen ashylǵan ıaslı balabaqshanyń dırektory.

«Úzdik jas oryndaýshy» nomınasııasynda «AMANAT musik» Halyqaralyq festıvaliniń laýreaty Dáýren Berikbolov qara úzip shyqty. Sonymen qatar ol qyrǵyz-qazaq festıvalinde 14 eldiń ónerpazdary arasynan II oryndy ıelengen, Qyrǵyzstandaǵy «Jyl tańdaýy - 2020» syılyǵynyń «Jyldyń jas, úzdik ártisi» nomınasııasyn jeńip alǵan.   

«Jetisý» telearnasynyń redaktory Kámshat Muhametjan «Úzdik jas jýrnalıst» atandy. Ol «Halyq alǵysy» tósbelgisiniń ıegeri, Túrkitildes jýrnalıster qory uıymdastyrǵan baıqaýda «Aqparat taratatyn úzdik tilshi» nomınasııasyn jeńip aldy.

Úsh bala tárbıelep otyrǵan Nurpeıisovter otbasy eń úzdik jas otbasy retinde marapattaldy. Bul jas shańyraq - «Jas otaý» oblystyq baıqaýynyń jeńimpazy.

Osy kúni barlyǵy 20 jas kóshbasshy marapattalyp, olarǵa arnaıy dıplomdar, estelik syılyqtar men aqshalaı sertıfıkattar tabystaldy.

Marapat ıeleri atynan «Úzdik jas jýrnalıst» Kámshat Muhametjan tilek bildirdi:

- Mundaı joǵary marapat alý men úshin zor qýanysh. Bul – meniń birneshe jylǵy eńbegimniń jáne ujymymnyń qoldaýynyń arqasy dep bilemin. Bul – bizdiń ortaq jeńisimiz. Ár jas óz salasynda úzdik bola alady, oǵan bizde barlyq múmkindik bar. Eń bastysy ózińe degen senimmen kásibı biliktiligińdi arttyryp, alǵa nyq qadam basý kerek dep oılaımyn. Barlyq jeńimpazdardy shyn júrekten quttyqtaımyn, - dedi ol.

Qatarynan ozyq shyqqan jastarǵa sharanyń arnaıy qonaǵy QR Aqparat jáne qoǵamdyq damý mınıstriniń orynbasary Bolat Tilepov izgi nıetin bildirip, quttyqtaý sózin arnady.

- Jastardy qoldaý – elimizdiń memlekettik saıasatynyń strategııalyq basym baǵyty. Táýelsizdiktiń 30 jylynda qol jetkizgen tabystarymyzdyń mańyzdysy da – osy bilimdi, talantty jastardyń ósip-jetilýi. Búgingi kúni ózderińdi jan-jaqty damytýǵa eshqandaı kedergi joq. Únemi talpyný kerek, básekege qabilettilikti arttyryp, bilim alýǵa kóp mán berý kerek. Kóp oqyp, jalyqpaı eńbektený kerek. Jastar syılyǵyn tapsyrý – Almaty oblysynyń basqa óńirlerge úlgi bolatyn ıgi sharasy. Aqparat jáne qoǵamdyq damý mınıstrliginiń atynan uıymdastyrýshylarǵa alǵys aıtamyn. Jetisý jastarynyń bar armandarynyń oryndalýyna tilektespin! - dedi B.Tilepov.

Merekeniń jalǵasy konserttik baǵdarlamaǵa ulasty. 

Jalpy Almaty oblysynda jastar arasyndaǵy jumyssyzdyq deńgeıin tómendetý, jumyspen qamtýǵa jaǵdaı jasaý, eńbek naryǵynda jastardyń básekege qabilettiligin arttyrýǵa kóp kóńil bólinedi. Máselen, 2021 jyldyń qarashasyndaǵy málimet boıynsha, 15 myńnan astam jas jumysqa ornalastyrylǵan, josparǵa sáıkes «Jastar praktıkasyna» 1648 túlek jiberilgen. Sol sııaqty «Dıplommen - aýylǵa» baǵdarlamasy boıynsha 974 jas mamanǵa 284,1 mln. teńge kóleminde kóterme járdemaqy berildi. Turǵyn úı alýǵa 568 mamanǵa jalpy somasy 2,5 mlrd. teńge jeńildetilgen nesıe berildi.