Mańǵystaýlyq 40 oqýshy zertteý ekspedısııasyna qatysty

Aqtaý qalasyndaǵy Nazarbaev Zııatkerlik mektebiniń 40 oqýshysy «Týǵan elge taǵzym -2021» ólketaný-zertteýshilik ekspedısııasyna qatysyp, kıeli óńirdi zerttedi. Qarashanyń 1-i men 5-i aralyǵynda oqýshylar Mańǵystaý ólkesiniń florasy men faýnasy, tarıhı oryndary, kıeli mekenderi men óndiris oryndaryn aralap, óńir tynysyn óz kózderimen kórdi.

• Maǵan «Týǵan elge taǵzym» ekspedısııasy aıasynda óńirdiń óndiris oryndaryna barǵanymyz erekshe unady. Mańǵystaý óńirinde shet elge eksporttalatyn ónimderdi kórý biz sekildi jastarǵa serpin beredi jáne teorııalyq turǵydan ótken prosessteri, elementterdi óz kózderimizben kórdik, - deıdi ekspedısııa qatysýshysy Qanat Saqpaev.

Tanymdyq jobanyń alǵashqy kúninde balalar ólke týraly jalpy maǵlumat jınaýdan bastasa, ekinshi kúni ólkeniń florasy men faýnasyn zertteýge attandy. Bul kúni zııatkerler Qarakól kóline, Kaspıı ıtbalyqtaryn ońaltý ortalyǵyna, straýs fermasyna jáne, botanıkalyq baqqa bardy. Al úshini kúni óńirdegi bıtým shyǵarý zaýyty men ammıak zaýytyn kórdi. Al tórtinshi kúni sapar Súltan úpi, Shaqpaq ata jerasty meshitteri men «Otpan taý» tarıhı mádenı keshenine saıahatpen jalǵasyn tapty.

«Týǵan elge taǵzym» tarıhı-ólketaný zertteýshiler ekspedısııasy «Nazarbaev Zııatkerlik mektepteri» DBUU bastamasymen jyl saıyn ótkizilip keledi. Ekspedısııanyń basty maqsaty – zııatkerlerdiń týǵan elge súıispenshiligin arttyryp, patrıottyq tárbıe berip qana qoımaı, Qazaqstannyń óndiristik áleýetin tanytý jáne balalardy zertteý jumystaryn júrgizýge baǵyttaý.