«Worldskills Kazakhstan» kásibı sheberlerdi anyqtaıdy

Búgin Elordadaǵy «Kazmedıa» ortalyǵynda «WorldSkills Kazakhstan – 2021» ulttyq chempıonatynyń ashylý saltanaty ótti. Ulttyq chempıonatqa elimizdiń barlyq óńirlerinen qatysýshy kolledj stýdentteriniń 600-ge jýyǵy qatysty.

Chempıonat Qazaqstannyń 8 óńiriniń óndiris alańdarynda 1 aı kóleminde ótkizilmek. Jalpy, Ulttyq chempıonat Respýblıka aýmaǵynda osymen altynshy ret ótýde.

WorldSkills – óz isiniń úzdikterin anyqtaıtyn, jumysshy kásibiniń mártebesin arttyryp, kásibılikti nasıhattaıtyn jahandyq joba.
Qazaqstan Respýblıkasynyń Bilim jáne ǵylym mınıstri A.Aımaǵambetov chempıonattyń ashylý saltanatynda sóz sóılep, sharanyń halyqaralyq standarttar negizinde tehnıkalyq mamandyqtar boıynsha óndiris oryndary salasyn joǵary tehnologııany jetik meńgergen jas mamandarmen qamtamasyz etýde mańyzy zor ekenin atap ótti.

Sondaı-aq, bas ustaz tehnıkalyq jáne kásiptik bilim júıesindegi ındýstrıaldy-ınnovasııalyq damý talaptaryna sáıkes júzege asyrylyp jatqan jobalar aıasynda jumysshy mamandaryn daıarlaýdyń ınfraqurylymyn damytý, «Jas maman» jobasy boıynsha oqý baǵdarlamalaryn qaıta qarap, modernızasııalaý, kadrlardy eńbek naryǵyna sáıkestendirý máselelerine toqtalyp ótti.

Shymkent qalasynan chempıonatqa joldama alǵan, 32 quzyrettilik boıynsha 33 qatysýshy-stýdentter qalanyń namysyn qorǵaıtyn bolady.