Qazaqstandyq stýdentter qaı elderde "tegin" bilim ala alady?

Bilim jáne ǵylym mınıstrligi úkimetaralyq kelisimder sheńberinde qazaqstandyqtar tegin oqı alatyn elder sany artqanyn málimdedi.

Mınıstrlikńtiń habarlaýynsha, qazaqstandyqtarǵa granttardy Slovakııa, Ázirbaıjan jáne Vetnam elderi bóledi. 2019 jyly bilim berý salasyndaǵy kelisimder aıasynda memleketter tiziminde 7 el bolsa, 2021 jyly olardyń sany 10-ǵa deıin artty. Memleketterdiń qatarynda Vengrııa, Polsha, QHR, Ýkraına, Belarýs, Qyrǵyzstan jáne Tájikstan bar. О́tken 2 jylda 1000-ǵa jýyq qazaqstandyq osy elderdiń jetekshi JOO-da tegin bilim aldy. Bıyl qazaqstandyqtarǵa 500-ge jýyq grant bólindi. Úkimetaralyq granttar aıasynda qazaqstandyqtar bakalavrıat, magıstratýra, doktorantýra, rezıdentýra baǵdarlamalary boıynsha oqı alady.

– Joǵary bilim berý salasyndaǵy halyqaralyq yntymaqtastyq kadrlyq áleýetke nátıjeli áser etedi. Otandyq joǵary oqý oryndarynda bilim berý prosesiniń sapasyn kúsheıtýmen qatar, azamattarymyzdyń álemniń jetekshi joǵary oqý oryndarynda bilim alý múmkindigine ıe bolýy úshin jaǵdaı jasaý qajet. Biz "Bolashaq" stıpendııalyq baǵdarlamasy boıynsha ǵana emes, úkimetaralyq kelisimder sheńberinde de qazaqstandyqtardy tegin oqytý úshin elder geografııasyn keńeıtip jatyrmyz. Qazaqstanǵa oralǵannan keıin mamandar alǵan bilimderin ózderi eńbek etetin salany damytý úshin qoldanady dep úmittenemiz, – dedi Bilim jáne ǵylym vıse-mınıstri Qýanysh Erǵalıev.

2019 jylmen salystyrǵanda konkýrstyq irikteýge qatysýǵa nıet bildirýshiler sany 15%-ǵa ósken. Úmitkerlerdi irikteýdi depýtattar, sarapshylar, ınjenerlik-tehnıkalyq, medısınalyq, gýmanıtarlyq jáne jaratylystaný ǵylymdarynyń ǵalym-doktorlarynan turatyn táýelsiz komıssııa júrgizedi.