"5-6 adamǵa birden juǵady". Qazaqstanda "úndi" shtammyna tán mýtasııa anyqtaldy

Qazaqstannyń densaýlyq saqtaý mınıstrligi el aýmaǵynda úndi shtammynyń taralý yqtımaldyǵyn anyqtady. Bul týraly mınıstrliktiń resmı saıty habarlady.

Mınıstrlik málimetinshe, Nur-Sultan qalasynda koronavırýs juqtyrý deńgeıiniń kúrt ósýine baılanysty naýqastardan alynǵan oń zerthanalyq úlgilerdiń PTR skrınıngi ótkizilgen.

"Skrınıng nátıjeleri boıynsha "Delta" shtamyna ("úndilik" shtamm) tán mýtasııaǵa kúdikti jaǵdaı anyqtaldy. Mýtasııanyń bolýyn jáne onyń "Delta" shtamyna jatatyndyǵyn túpkilikti rastaý DNQ úlgilerin tolyq genomdyq sekvenırleý aıaqtalǵannan keıin belgili bolady" delingen habarlamada.

Mınıstrlik dereginshe, "Delta" koronavırýs shtamy asa kontagıozdy jáne anyqtalǵan shtamdarǵa qaraǵanda juqpalylyǵy 60%-ǵa joǵary, qazirgi aınalymdaǵy shtamdar 1 adamnan orta eseppen 3-4 adamǵa taralatyn bolsa, bul shtamm 5-6 adamǵa birden juǵady jáne 7 kúnge sozylatyn qysqa ınkýbasııalyq kezeńmen sıpattalady.

"Indetti juqtyrǵandar býyndar men ishtiń qatty aýyrsynýyn sezinedi, júrek aınyp, loqsıdy, aýrý saldarynan adam sańyraý bolyp qalýy ábden múmkin jáne aıaqtardyń mıkrotrombozyna ákeledi. Sońǵy zertteýler kórsetkendeı, koronavırýstyń "Úndilik" shtamy aýrýhanaǵa jatqyzý men ólim-jitimniń joǵary yqtımaldyǵymen baılanysty" delingen habarlamada.

Dúnıejúzilik densaýlyq saqtaý uıymynyń 2021 jylǵy 20 maýsymdaǵy málimetteri boıynsha SARS-CoV-2 "Delta shtamm" álemniń 174 elinde anyqtalǵan.