• USD 424.85

  • EUR 504.21

  • RUB 5.84

  • CNY 65.86

26 Qyrkúıek, 05:34:36
Almaty
+9°

Almaty, Shańyraq yqshamaýdany, Aǵaıyn aıaldamasynyń mańyndaǵy shaǵyn dúńgirshek. Bul telefon jóndeýmen aınalysatyn Eskendir Qalıbaıdyń 4 jyldan bergi jumys orny. Ony Shańyraq, kórshiles Áıgerim yqshamaýdany turǵyndarynyń birazy biledi. Eskendir telefonmen qatar noýtbýk jóndeıdi. Kóshirme jasaý, sýretke túsirý, ony shyǵarý sekildi qyzmet túrlerin de usynady. Temirjol dıspetcheri, áskerı adam, shashtaraz bolýdy qalaǵan ol bul kásipke kezdeısoq kelgen.

Eskendir 1996 jyly dúnıe esigin ashqan. Almaty oblysynyń týmasy. 9-synypty bitirgen soń Almatydaǵy Kólik jáne kommýnıkasııa akademııasynyń kolledjine "Dıspetcher" mamandyǵyna túsedi. Tańdaýyna úıindegilerdiń yqpaly úlken bolǵanymen, oqý barysynda mamandyǵy ózine de unaıdy. Tehnıka tilimen tanystyǵy osy kolledjde bastalady. Biraq kolledjdi aıaqtaǵan soń jumys tabyla salmady. Almaty-1, Almaty-2 temirjol vokzaldarynan "oryn joq" degendi estıdi. Sóıtip júrgende 2014 jyly Eskendirdi áskerge alyp ketti.

Áskerı qyzmetin О́skemen qalasy mańyndaǵy Aqmır eldimekeninde jaıaý ásker sapynda Zenıt dıvızıony 4-rotada óteıdi. 4-rota О́skemen boıynsha úzdik atanyp, elordadaǵy áskerı paradqa qatysady. Tehnıkadan habary bar bolǵandyqtan oqý-jattyǵý jıyndary, polıgon kezinde oǵan rasııamen jumys isteý senip tapsyrylady. Aýylda qyzyǵýshylyqpen shash qyrqatyn ádeti áskerde kásipke aınalyp, qatardaǵy sarbazdardan bastap, maıor, polkovnıkterge deıin Eskendirge shash aldyrýǵa keletin. Sonyń arqasynda áskerı bólimdegilermen etene aralasyp, batalon basshysy boryshyn ótep bolǵannan keıin áskerı bólimde baılanysshy retinde kelisimshartpen jumys isteýdi usynady. Eskendir usynysty qýana qabyldaıdy. Alaıda bir sarbazben janjaldasyp, onyń arty daýǵa ulasyp, aqyry qyzmet týraly umytýyna týra keledi.

Áskerden kelisimen, kompıýter tilin meńgergendikten ózin sol qyrynan synap kórgisi keledi. Jumys jaıymen mektep, ákimshilikke barady. Biraq ol jerlerde 20 myń, 35 myń teńge jalaqy usynǵan soń jarty jylǵa jýyq Almatyda kúzetshi bolyp isteıdi. О́zi Shańyraqta ápkesimen turady. Jumys talabyna saı bos ýaqytta jattyǵý zalyna baryp júredi. Birde zal qojaıynyna kompıýterden qaǵaz shyǵarýǵa kómektesip, uzamaı zaldyń qaǵaz jumystaryna qolǵabys qylyp turady. Munysynyń óteýi retinde sport seksııalarynyń kez kelgen túrine tegin abonement beriledi. Keleńsiz jaıt bolmaǵanda kúzetshi bolyp júre berer me edi, kim bilsin.

– Jumysta velosıped urlandy. Kameradan qarasaq, urlyq meniń smenime deıingi smende tańǵa jýyq jasalypty. Bastyqtar "smendi durys qabyldap almadyń" dep meni de jazyqty etip, jalaqymyzdan 30 myń teńgeden ustaıtyndaryn aıtty. О́zim alatyn 60 myńnyń 30 myńyn ustap qalǵanyna kelispeı, jumystan shyǵyp kettim, – deıdi ol.

Eskendir qaıtadan jumys izdeıdi. Mamandyqpen isteıin dese, Almatyda oryn joq, mektepte jalaqy az. Osyny oıǵa alyp, endigide áskerde sarbazdardyń shashyn qysqartyp mashyqtanǵan eski kásibi boıynsha jumys izdeıdi.

 

– Shańyraqtaǵy shashtarazdardyń on shaqtysynda bolǵan shyǵarmyn. Kóbinde bos oryn joq. Nemese áıelder masteri qajet. Áıelder shashyn qııý qoldan kelmeıdi. Sóıtip kele jatqanda jolda telefon jóndeıtin shaǵyn býtık kezikti. Ishine kirip, "kómekshi kerek emes pe?" dep suradym. "Istegiń kelse, kúnine 1000 teńge, aıyna 30 000 tóleımin" dedi býtık ıesi. Aǵaıyndy jigitter ashqan eken. Aǵasy basqarady, inisi master. Kelistim. Bala kúnimnen tehnıkany shuqylaý unaıtyndyqtan ózime qyzyq kórindi, – deıdi Eskendir.

 

Bul 2016 jyldyń basy bolatyn. Eskendir úırený úshin az jalaqyǵa jumys isteýge kelisip, ol jerde tup-týra 1 jyl júredi. Telefon jóndeýdiń qyr-syryna qanyqqan soń jeke ketedi. Buryn azyq-túlik dúkeni bolǵan shaǵyn býtıkti jalǵa alyp, birtindep kásibin bastaıdy.

Sýretti túsirgen avtor

Sodan beri tórt jyl ótti. Búginde Eskendirdiń turaqty klıetteri kóp. Aıtýynsha, telefondardyń mıkroshemasy uqsas keledi. Sondyqtan bólshek tabylsa, buzylǵan kez kelgen qurylǵyny jasaı alady. Osydan 2-3 jyl buryn adamdardyń qolynda 100 myń teńgege deıingi telefondar bolsa, búginde baǵasy 200 myń, 300 myń teńgeniń ústindegi telefondardy ustaýshylar kóbeıgenin baıqaǵan.

 

– Jurttyń bári qazir telefondy kredıtke alady. О́zderi qarapaıym tursa da qymbat telefon ustaıdy. Kóbine telefondardyń ekrany synady, zarıadtalatyn jeri qurtylady. Ondaılardy garantııa boıynsha jasamaǵan soń maǵan keledi. Men zapchastqa ketetin shyǵyn men jumys baǵasyn bólek-bólek aıtamyn. Remont baǵasyn jalpy aıta salsań, aqshanyń bári meniń qaltamda qalady dep oılaıdy. Sondyqtan "zapchast osynsha turady, jumysy munsha" dep túsindiremin. Mysaly Samsýngtardyń ekrany qymbat. 50 myń teńgelik telefonnyń ekrany 30 myń teńge turady. Sonyń ústine jumys aqysyn qosamyn. Sonda 33 myń, 35 myń shyǵady. Qymbat Samsýngtardyń ekrany 100 myńnan asyp ketedi. Aıfondardiki arzandaý, – degen ol jóndeý kezinde qıyndyq týmas úshin Qazaqstanda bólshegi bar telefon satyp alýǵa keńes beredi.

 

Eskendirge ara-arasynda "telefon jóndeýdi úıretińizshi" degen ótinishpen mektep jasyndaǵy balalar kelip turady. Byltyr 15 shaqty balaǵa tegin kýrs ótkizgen. Oqýshylardyń keıbiri úırengenin vıdeoǵa túsirip, instagram-ǵa júktep tanymal bolýdy armandaıdy. Vaın túsirip, bloger bolǵysy keletinder de bar.

Eskendirdiń ózi telefonǵa, ony shuqylaǵanǵa qyzyqpaıdy. Munysyn "ýaqyt alady, jumysqa kesiri tıedi" dep túsindiredi.

Keleshekte telefon remonttaıtyn birneshe núkte ashý jospary bar. Jaz mezgilinde taǵy bir núkte ashyp ta kórgen. Biraq jumysty tııanaqty isteıtin, klıentti aldamaıtyn adam tabylmaı qaıta japqan.

Sýretti túsirgen avtor

– Bizdiń jumysta ár klıenttiń rıza bolǵany mańyzdy. Bir adamdikin durys istemeseń, birtindep klıent joǵaltasyń, sosyn jumys júrmeıdi. Al bir adamdy rıza etseń, erteń ol tanysyn ákeledi, klıentiń kóbeıedi. Masterler arasynda maıda-shúıde jumysqa 5 myń, 10 myń suraıtyndar bar. Adamdar bilmegen soń suraǵanyn amalsyz beredi. Biraq sonysy báribir áshkere bolyp, qadirin joǵaltady. Ondaı masterge adam ekinshi jýymaıdy, – deıdi ol.

Eskendir úılengen. Kelinshegi mektepte muǵalim. Ibrahım degen uly bar. Jaqynda birge tolady. Keleshekte Almatyǵa jaqyn mańnan jer alyp, úı salǵysy keledi.

Melis Seıdahmetov

Almaty oblysy Kerbulaq aýdany Qyzyljar aýylynda týǵan. Ál-Farabı atyndaǵy Qazaq ulttyq ýnıversıteti fılosofııa jáne saıasattaný fakýltetin bitirgen. 2015-2019 jyldary «Prezıdent jáne Halyq» gazetinde tilshi, shef-redaktor bolyp istegen. 2019 jyldan beri Qamshy portalynda qyzmet atqarady.

Avtormen onyń Facebook paraqshasy arqyly habarlasýǵa bolady.

Jazylyńyz

"Qamshy" silteıdi

Qate tapsańyz, qajetti bólikti tańdap ctrl+enter basyńyz.

Pikir qaldyrý

pikir