Túrkııada turatyn Laılo Makkambaeva: Qazaqstanda hıdjap kıip, jumys tappaısyń

Laılo Makkabaeva Túrkııaǵa 2019 jyly kóship kelgen. Qazir Stambýl qalasynda turady. Halyqaralyq sheteldik kompanııalardyń birinde logıst bolyp jumys isteıdi. Laılo Makkabaevanyń aıtýynsha, Qazaqstanda hıdjap kıip jumysqa ornalasý óte qıyn. Týǵan jerin tastap, ózge memleketke ketýdegi basty sebep – osy. Laılo bóten elde qalaı ómir súrip jatqanyn, eki jyl ómirinde qandaı ózgeris bolǵanyn Qamshy portalyna bergen suhbatynda aıtyp berdi.

– Men 1997 jyly Shymkent qalasynda týdym. Bala kezden ózge tilderde sóılep, úırenýge qyzyǵatynmyn. Úıde qazaqsha, ózbekshe sóılesetinbiz. Mektepti qazaqsha oqyp, úzdik támámdadym. 2013-2017 jyldary Túrkistan qalasyndaǵy Q.A.Iаsaýı atyndaǵy Halyqaralyq qazaq-túrik ýnıversıtetinde aǵylshyn-túrik tili mamandaǵy boıynsha bilim aldym. Budan bólek orys jáne arab tilderin óz betimshe úırendim. Stýdenttik kezde, hıdjap kıe bastadym. 2019 jyly magıstrant atandym. Alaıda qos dıplomym bolǵanyna, 6 tildi jetik meńgergenime qaramastan jumysqa ornalasý maǵan qıynǵa soqty. Oramalyma baılanysty kóp jerde shettetip jatty. Ásirese memlekettik bıýdjettik mekemeler, iri jeke kompanııalar keri qaıtaryp jatty, – deıdi ol.

Laılonyń aıtýynsha, Túrkııada jumysqa ornalasý úshin, adamnyń syrt kelbeti, kıimi, ulty jáne dini múldem mańyzdy emes. Bastysy óz isińniń mamany bolsań jetkilikti.

– Qazir Túrkııada aǵylshyn jáne túrik tili mamandyǵy boıynsha doktarantýrada oqımyn. Alaıda sabaqqa kúndelikti barýdyń qajeti joq. Sondyqtan alǵashqy jyldary kýrtarda aǵylshyn tilinen sabaq ótip, kúnimdi kórip júrdim. Keıin sheteldik kompanııada jumysqa shaqyrdy. Alatyn aılyǵym, bizdiń kýrspen eseptegende 200 myń teńgeni quraıdy. Árıne, bul kóp emes. Biraq óz basyma jetedi. Men munda qaltamdy qampaıtý úshin kelgenim joq. О́z mamandyǵym boıynsha jumys istep, ózimdi damytyp, tanym kókjıegimdi keńeıtkim keldi. Ol úshin Túrkııada barlyq múmkindik bar. Túrkııaǵa alǵash kelgennen ózimdi jaıly sezindim, jergilikti halyq jyly qarsy alyp, jol siltep, kómekterin usynyp jatty. Baýyrlas el bolǵandyqtan, túrikter qazaqtardy erekshe jaqsy kóredi. Qos memlekettiń uqsastyqtary da barshylyq. Mysaly, taǵamdary, táttileri, ádet-ǵuryp pen salt-dástúrinde aıtarlyqtaı ózgeshilik joq, – deıdi Laılo Makkabaeva.

Laılonyń shetelde bolǵanyna ókingen sátteri de bolǵan. Týǵan inisi qaıtys bolǵanda jaqyndarynyń janynan tabyla almaǵan. Sol úshin ózin kináli sezinedi.

– Týǵan jerdiń tasy da ystyq. Jumysta otyrǵan kezde Qazaqstandy kartadan kórgende, qazaq tilinde sóılegen jerlesterimdi kezdestirgende, kózime eriksiz jas keledi. Buıyrsa, qasıetti ramazan aıynan keıin otbasyma, jaqyndaryma baryp kelý oıymda bar. Alaıda Qazaqstanda túbegeıli qalý áli oıymda joq. Oǵan suhbattyń basynda aıtqan jaǵdaı sebep. Biraq meniń júregim, árdaıym týǵan jermen birge. Men óz elimiń patrıotymyn! О́zimniń ultym ózbek bolǵanymen, júrgen jerimde qazaq tilinde sóıleýge tyrysamyn. Qazaq halqynyń ereksheligin, qonaqjaılyǵyn aıtyp júremin, –  dedi Laılo.