26 Aqpan, 2021 Jambyl oblysy
![](/media/2021/02/26/crop-288_15_707x943_f4070ace-0fda-4c7f-ae0a-8fe6640cd932.jpeg?width=600&height=480)
Foto: Ashyq derekkóz
Jambyl oblysynda Elbasy Nursultan Nazarbaevtyń «Týǵan jerge taǵzym» bastamasy aıasynda jáne Táýelsizdiktiń 30 jyldyq mereıtoıyna oraı «Jomart túlek» jıyny ótti. Áýlıeata topyraǵyndaǵy bul alqaly basqosý respýblıkada tuńǵysh ret uıymdastyryldy. Halqymyzda «Týǵan jerge týyńdy tik!» degen qanatty sóz bar. Demek, ár adam kindik qany tamǵan jerin umytpaýy tıis. Qolynan kelse, kómegin aıamaýy kerek.
Bul jıynnyń, rasynda máni tereń, mańyzy bólek. О́ıtkeni, eldiń órkendeýi men damýy jolyna erekshe atsalysyp, álemdik arenalarda kók týymyzdy jelbiretip júrgen túlekterimizdiń jetistikteri – týǵan jerdiń topyraǵymen tamyrlas. Sondyqtan da atalǵan basqosýǵa eńbek erleri, memleket qaıratkerleri, mádenıet salasynyń maıtalmandary, sportshylar, ustazdar men bıznesmender elimizdiń túkpir-túkpirinen qatysty. Malaızııa, AQSh, Reseı syndy memleketterden onlaın baılanysqa shyqty.
Alqaly kezdesý mańyzdy qoǵamdyq bastamalardy kóterip, túrli salada eńbek etip júrgen túlekterdiń tabysty ómir jolyn jas urpaqqa nasıhattaýdy maqsat etedi. El egemendigin alǵaly óńir mektepterinen 400 myńnan astam túlek qanat qaǵypty. Sol sebepten biz aımaq basshysy Berdibek Saparbaevtyń bastamasymen jambyl-tylek.kz saıtyn iske qostyq. Búginde onda 80 myńǵa jýyq túlek tirkelgen. Olardyń arasynda ózderi bilim alǵan ordasy men aýylynyń damýyna tek sońǵy 5 jylda 2 mlrd teńge kóleminde demeýshilik kómek kórsetken azamattar bar. Bıyl osy mesenat zamandastarymyzdyń bastamasymen «Oqýshylar saraıy», «Anaǵa taǵzym», ústel tennıs ortalyǵy, úlken tennıstik alań, «О́ner úıi» sııaqty quny 5,4 mlrd teńge bolatyn aýqymdy jobalar qolǵa alyndy.
Jıynǵa qatysqan oblys ákimi týǵan topyraqtan qýat alyp ósken árbir áýlıeatalyq túlek egemen elimizdiń ıgiligin eseleı túsetindigine senim bildirdi. Sonymen qatar jalpy quny 5,5 mlrd teńgeni shamalaıtyn 30-dan astam áleýmettik jobany usyndy. Kópshilikti osy jobalar arqyly týǵan ólkemizdiń kórkeıe túsýine qoldaý bildirýge shaqyrdy.
Bıylǵy Táýelsizdiktiń 30 jyldyq mereıtoıyna oraı oblysta halyqtyń ál-aýqaty men turmys sapasyn arttyrýǵa baǵyttalǵan «30 ıgi is» jobasy iske asyrylady. Nátıjesinde 136 áleýmettik, 150 ınfraqurylymdyq nysan paıdalanýǵa berilmek. Sondaı-aq «Meıirim», «Zeıin», «Qamqor», «30 ıgi is» sııaqty 9 áleýmettik joba men 6 qaıyrymydylyq aksııasy uıymdastyrylady.
"Rýhanı jańǵyrý" baǵdarlamasyndaǵy "Týǵan jer" arnaıy jobasyn iske asyryp, Qazaq Elinde tuńǵysh ret "Jomart túlek-2021" túlekter kezdesýin uıymdastyrǵany úshin Jambyl oblysynyń ákimi B. Saparbaevqa Elbasy N.Nazarbaev alǵys bildirdi. Ony búgingi kezdesýge onlaın qatysqan Qazaqstannyń Tuńǵysh Prezıdenti keńsesiniń basshysy M.Qasymbekov jetkizdi.
Jıyn sońynda oblystyń damýyna úles qosqan azamattarǵa "Jomart túlek" syılyǵy tabys etildi.
Qate tapsańyz, qajetti bólikti tańdap ctrl+enter basyńyz.
Usynylǵandar
Pikir qaldyrý
pikir