• USD 468.56

  • EUR 497.56

  • RUB 7.3

  • CNY 67.18

29 Naýryz, 01:31:24
Almaty
+35°

«Sıfrly Qazaqstan», «Halyq únine qulaq asatyn memleket», «elektrondy qujat aınalymy» dep jarııaǵa jar salǵanda ysqyryǵymyz jer jarady, biraq «aıdaǵanymyz rasynda da bes eshki» deńgeıinde. О́ıtkeni Úkimettegi kez kelgen jıynda joǵarydaǵy uǵymdar mindetti túrde bir qozǵalady. Al halyq arasynda ol júıelerdiń júzege asýy qalaı? Másele osynda!

Jańa jyldan soń ESQ alý úshin noýtbýgymdy qostym. Aldymen NCALayer baǵdarlamasyn noýtbýkqa ornatý qajet eken. Ǵalamtordan júktep te, lısenzııasy bar baǵdarlamany ornatyp ta kórdim. Ǵalamtor jyldamdyǵynyń álsizdiginen baǵdarlama ornatylmady. Bul onlaın qyzmetke júgingisi keletin halyqtyń kezdesetin eń birinshi máselesi!

Jaqynda «2021 jyly elordada, al 2025 jyly respýblıkalyq mańyzy bar qalalar men oblys ortalyqtarynda 5G ınterneti qosylady» degen resmı habarlama tarady. Shyny kerek, qazir tarıfke saı aqysyn tólep otyrsań da, ne qolymyzdaǵy telefonymyz, ne roýterimiz 4G ustamaıdy. Iаǵnı, elimizdegi ǵalamtor jyldamdyǵy tek memlekettik minberlerde ǵana joǵarylap jatyr, al halyq qoldanyp otyrǵan ǵalamtor jyldamdyǵyn taýǵa shyǵyp, úıdiń shatyrynda otyryp sabaq oqyp júrgen oqýshylar deńgeıinen-aq baıqaýǵa bolady.

Kómek surap 1414 biryńǵaı baılanys qyzmetine qońyraý shaldym. 45 mınýttaı jelide kútken soń, budan artyq kútýge tózimim jetpeı jaqyn ornalasqan Halyqqa qyzmet kórsetý ortalyǵyna bet aldym. Bul ESQ alýdaǵy ekinshi másele. Keıde onlaın keńes suraý úshin qońyraý shalsań saǵattap kútseń de, qońyraýǵa jaýap ala almaısyń. Iаǵnı onlaın qyzmet qoljetimsiz.

Eriksiz karantındik jaǵdaıǵa qaramastan HQO-ny betke aldym. Ortalyqtyń aldyna jaqyndaǵanym sol, «ESQ ashamyz, ESQ jańartyp beremiz, myń teńge» degen jas jigitter jolymdy kes-kesteı berdi. Baıqasam, ortalyqtyń aldynda túrli notarıýs qyzmetimen qosa, «ESQ ashamyz» degen habarlandyrýlar da qaptap ketipti. Bul úshinshi másele. Osylaısha, júıeniń ózi qyzmetti úıden qoljetimsiz etip, aýadan aqsha jasap, tegin qyzmetti satyp júrgenderge aıdap ákeletin sekildi....

Ár adamnyń jeke derek qory saqtalatyn derbes elektrondyq sıfrlyq qoltańbasy qalaısha kez kelgen jerde, kóshede ashyla berýi kerek?! Jekelegen adamdarǵa ESQ ashý quziretin kim bergen? Tegin qyzmet qalaısha, dál halyqqa qyzmet kórsetý ortalyǵynyń aldynda aqyly saýdalanyp jatyr? Jalpy qoǵamnyń damýyna halyq ilese alyp jatyr ma? Úlken minberler men kabınetterde ǵana aıtylatyn elektrondyq qujat aınalymy uǵymynyń halyq ishinde jumys isteýi qalaı?

Aıtpaqshy, whatsapp qosymshamda ózim turatyn aımaq turǵyndaryna arnalǵan arnaıy chat bar. Keshe keshkisin, «ESQ asha almaı otyrmyn, balabaqsha úshin» dep bir kelinshektiń sms jazǵany sol, kelesi turǵyn «Sát» dúkenine barsań, 2000 teńgege ashyp beredi dep «jón siltedi». Sıfrlanǵan Qazaqstan ázirge osy bolyp tur...

Qýanysh Ersuńqar

Avtormen onyń Facebook paraqshasy arqyly habarlasýǵa bolady.

Jazylyńyz

"Qamshy" silteıdi
Ilmek sózder: ESQ Sıfrly Qazaqstan

Qate tapsańyz, qajetti bólikti tańdap ctrl+enter basyńyz.

Pikir qaldyrý

pikir