Zeınetaqy jınaqtaryn ınvestısııalaý: Qyzmet qashan qol jetimdi bolmaq?

Qazaqstandyqtar zeınetaqy jınaqtarynyń bir bóligin kelesi aptadan bastap ınvestısııalaýshy kompanııaǵa bere alady. Bul týraly qarjy naryǵyn retteý jáne damytý agenttigi baǵaly qaǵazdar naryǵy departamentiniń dırektory Edil Medeý málimdedi.

Qazirgi tańda zeınetaqy aktıvterin basqarýǵa qatysty jumystar júrgizilip jatqanyn aıtty. Kelesi aptadan bastap qyzmet qoljetimdi bolady.

"Zeınetaqy aktıvterin basqarýdy josparlap otyrǵan jekelegen basqarýshy kompanııalar BJZQ-men zeınetaqy aktıvterin senimgerlik basqarý sharttaryn jasasý jumysyn bastap ketti. Aqpannyń basynan olar aqparat almasýǵa jáne zeınetaqy jınaqtaryn berýge baılanysty tehnıkalyq máselelerdi pysyqtap jatyr. Shart jasasyp, BJZQ saıtynda basqarýshy kompanııalardyń tizilimi jarııalanǵannan keıin salymshy kompanııany tańdap, óz jınaqtarynyń bir bóligin sol jerge aýdara alady. Kelesi aptada bul opsııa salymshylarǵa qoljetimdi bolady dep oılaımyz", - dedi Edil Medeý agenttiktiń brıfınginde.

Qazaqstanda 18 basqarýshy kompanııanyń altaýy zeınetaqy aktıvterin basqarý quqyǵyn paıdalana alatynyn naqtylandy. Bul týraly agenttik tóraǵasynyń orynbasary Marııa Hadjıeva aıtyp berdi. 

"Bul bıznesti júrgizýge arnalaǵan sheshim, sondyqtan basqarýshy kompanııa men onyń aksıonerleri bul sheshimdi ózderi qabyldaýy kerek. Sol sebepti alty kompanııanyń bári bul qyzmet naryǵyna shyqpaýy da múmkin. Basqarýshy kompanııalardy qosý, olardyń bul qyzmetti mindetti túrde kórsetetinin bildirmeıdi", - dep túsindirdi Hadjıeva.

Zeınetaqy jınaqtaryn kompanııalar basqarýyna berý úshin ony BJZQ-men birge júrgizetin qosymsha shart jasasý qajet.

Buǵan deıin agenttik jınaqtardy merziminen buryn alý sheńberinde qazaqstandyqtardyń zeınetaqy aktıvterin basqarýǵa ruqsat bere alatyn alty kompanııany atady:

- First Heartland Jysan Invest AQ;

- BCC Invest AQ - "Bank SentrKredıt" AQ-nyń enshiles uıymy;

- Halyk Global Markets AQ ("Qazaqstan Halyq banki" AQ EU)");

- Halyk Finance "Qazaqstan Halyq banki" EU AQ;

- First Heartland Capital AQ;

- "Sentras Sekıýrıtız" AQ.