06 Aqpan, 2021 Barlyq aımaqtar
Kórneki sýret
Karantın kezinde tabysynan aırylýyna oraı qazaqstandyqtarǵa tólengen 42500-diń jyry áli basylar emes. Barlyq jerge blok postar qoıylyp, halyq jappaı jumyssyz, tabys kózinsiz qalǵanda 42500 teńge shól daladaǵy bir jutym sýdaı bolǵany ras. О́ıtkeni halyq órship turǵan indetke qaramastan aqshany rásimdeý úshin aıaqtan tozdy.
Biraq artynsha járdemaqyny zańsyz alǵandar qylmystyq jaýapkershilikke tartylatyny týraly habar taraǵanda, ash qalsa da isti bolýdan qoryqqan halyq jappaı aqshany keri qaıtara bastady. Nátıjesinde respýblıka boıynsha 163 myń 75 adam alǵan aqshasyn memleketke qaıtaryp bergen. 42500-di qaıtarý prosesi munymen bitpeı, talaı adam áli de 42500-di keri "qusatyn" sekildi...
О́ıtkeni 42500-di alǵan analar jórgekpul men bala 1 jasqa tolǵansha tólenetin járdemaqyny rásimdeı almaı, eriksiz karantın kezinde alǵan aqshalaryn keri qaıtarýda. Solardyń biri almatylyq Dına ótken jyly qarasha aıynda ekinshi balasyn bosanǵan. Almaty qalasyndaǵy Almaly aýdandyq áleýmettik qamsyzdandyrý bólimine baryp, tıesili járdemaqyny rásimdeý kezinde "42500-di keri qaıtarmasa, járdemaqy rásimdeı almaıtynyn" jetkizgen.
– Karantınniń sońǵy bir jarym aıynda 60 myńdaı aqsha aldym. Bir aıǵa tolyq 42 500 sosyn jarty aıǵa 21250 teńge tústi. Járdemaqy rásimdeı almaıtynymdy estigen soń, Halyq bank arqyly keri qaıtardym. Túbirtegin Almaly aýdandyq Halyqty qamsyzdandyrý bólimine ótkizgen soń ǵana járdemaqy qujattary rásimdele bastady. Karantın kezinde jumyssyz qalǵanym ras. Jurt qatarly tabyssyz qalǵan soń 42 500 teńgege ótinish berdim. Qujattaryma saı, ózderi quptap, sońǵy bir jarym aı aldym. Eger zańsyz bolsa, sol kezde nege berdi? Qazir kishkentaı nárestemdi qolyma alyp, ony suraý salyp, joqtap júrýge ýaqytym joq. Onyń ústine jas bosanǵan soń indet juqtyryp alýdan qorqyp, qýdalamaı qoıa saldym. Qaryzǵa bergendeı qaıtaryp aldy ǵoı, – deıdi jas bosanǵan ana.
Jalǵyz almatylyq Dına ǵana emes, Qostanaı qalasynda da tótenshe jaǵdaı kezinde bala kútimine baılanysty járdemaqy rásimdeý kezinde qıyndyqqa tap bolǵan analar 42500 teńgeni qaıtartyp jatqanyn osyǵan deıin de jazǵan bolatynbyz.
Aıta keter jaıt, byltyr jazda Eńbek jáne halyqty áleýmetti qorǵaý mınıstri Birjan Nurymbetov: "Birde-bir adam 42 500 teńge alǵany úshin, tipti jibergen qateligi úshin qylmystyq jazaǵa tartylmaıdy. Oǵan negiz joq. Osyǵan núkte qoıaıyq. Eshkim jaýapkershilikke tartylmaıdy. Biz eshkimdi teksermeımiz. Sebebi bul – áleýmettik tólem. Bul – áleýmetke baǵyttalǵan tólem. Eshkim tólem alýǵa quqyly azamattardan aqshany qaıtarýdy talap etpedi. Taǵy eske salaıyn – eshkimge aqshany qaıtarýdyń qajeti joq" degen edi. Biraq bererin berip alyp, 42 500-di daýlaýdan memleketimiz sharshaıtyn emes.
Zańger Myrzabek Bekberdi "bul 42500 berý kezinde zańdyq tetikteriniń durys jasalmaýynan týyndap otyrǵan másele" deıdi. Biraq bul memlekettiń qateligi ǵoı! Endeshe ol úshin qarapaıym halyq nege zardap shegip, aıaǵynan tozýy kerek?!
Karantın kezinde talaı el halqyna barynsha materıaldyq jáne moraldyq kómek berýge umtyldy. Al bizdiń elimiz 42500 berip, "qaryq qylyp", onyń óziniń bir bóligin qaıtaryp alǵany azdaı, endi analarymyzdyń járdemaqysyn 42500 teńge úshin saýdaǵa salǵany qalaı?!
Qýanysh Ábildáqyzy
Qate tapsańyz, qajetti bólikti tańdap ctrl+enter basyńyz.
Pikir qaldyrý
pikir