Abaı ýnıversıtetinde Tuńǵysh Prezıdent kúni atalyp ótildi

Abaı atyndaǵy Qazaq ulttyq pedagogıkalyq ýnıversıtetindegi «Uly dala tulǵalary» ortalyǵy 2020 jylǵy 30 qarashada  Qazaqstan Respýblıkasynyń Tuńǵysh prezıdenti kúnine arnalǵan «Eli súıgen, elin súıgen Elbasy» atty is-shara ótkizdi.

Is-sharaǵa ǵalymdar, belgili qoǵam qaıratkerleri, jas ǵalymdar, doktoranttar, otandyq oqý oryndarynyń magıstranttary, stýdentteri jáne qazaqtyń jetekshi bilim ordasy – ál-Farabı atyndaǵy Qazaq ulttyq ýnıversıtetiniń ustazdary: Begalıeva A.K., Toıǵanbekova M.,Idrısova G.A., Naralıeva R.T. qatysty.

Azamattyq-patrıottyq sharany moderator Abaı atyndaǵy Qazaq ulttyq pedagogıkalyq ýnıversıtetiniń ǵylym jáne sıfrlandyrý jumysy jónindegi prorektory, fızıka-matematıka ǵylymdarynyń doktory Saıabek Sahıev Qýanyshbekuly júrgizdi.

«Táýelsizdiktiń jeti qyry» atty derekti fılm kórsetilip, onda QR UǴA akademıgi, tarıh ǵylymdarynyń doktory, professor H.M. Ábjanov «Tarıhty jasaıtyn úsh qudiret bar: ol – halyq, ol – halyqtan shyqqan tulǵa, ol – bılik», – dese, ózi minbege shyǵyp sóılegen sózinde elimizdiń birinshi Prezıdenti   N.Á. Nazarbaevtyń dúnıe júzindegi alyp memlekettermen de qarym-qatynas jasaýǵa qol jetkizgenin atap ótti.

R.Súleımenov atyndaǵy Shyǵystaný ınstıtýtynyń dırektory, fılologııa ǵylymdarynyń doktory, professor Dáýlethan Másimhanuly Qazaqstan táýelsizdik alǵannan keıin tarıhı otanǵa oralýǵa jol ashylǵanyn, ózi kelgen 20 jyldaı ýaqytta Qazaqstan ǵylymda biraz jetistikke jetkenin aıtyp, Elbasynyń tarıhı tulǵasyn joǵary baǵalady.

Azamattyq-patrıottyq shara barysynda dárisker QR Tuńǵysh Prezıdenti Nursultan Ábishuly Nazarbaev memlekettiń birligin, konstıtýsııasyn, adam men adamzattyń quqyqtaryn jáne bostandyqtaryn qorǵaýdy qamtamasyz etkeni, jańa táýelsiz memlekettiń negizin qalaýshy ekeni jáne Nur-Sultan qalasynyń salynýyna muryndyq bolǵany eshqandaı daý týdyrmaıtyny anyq ekendigin atap kórsetti. Bul shara týraly tolyq málimetti www.http/kaznu.kz saıtynan tanysa alasyzdar.

Az ǵana merzimde qos qurlyqtyń arasyndaǵy ulan-baıtaq keńistikte babadan qalǵan qonysty túgel ıemdenip qaldyq, ańsaǵan azattyqqa qan tókpeı beıbit jolmen jettik.

Burynǵy KSRO eliniń keńistiginde qurylǵan TMD memleketteriniń ishinde halyqtar dostastyǵyna, toleranttyqqa basymdylyq berilgen parasatty saıasattyń arqasynda otyz jylǵa jýyq ýaqyt ishinde ultarazdyqty, dinarazdyǵyn qozdyrmaı, ýshyqtyrmaı kók aspannyń astynda kók týyn jelbiretip, beıbit ómir súrip jatqanymyzda bıliktiń, QR Tuńǵysh Prezıdentiniń, elimizdiń tıtýldy ulty – qazaq halqynyń keńpeıildili ekeni týraly álem baspasóz quraldarynda az aıtylyp jatqan joq.  

Qazaqstan Táýelsizdik alǵan tusta ult tarıhyndaǵy jańa dáýir dál osy 1 jeltoqsan kúninen bastalǵan bolatyn. О́ıtkeni, ata-babamyzdyń ǵasyrlar boıy asyl armany bolyp kelgen táýelsiz  Qazaq memleketin qurý jónindegi tarıhı amanaty 1991 jylǵy 1 jeltoqsanda oryndalyp, dál sol kúni Nursultan Ábishuly Nazarbaev Egemen Qazaq eliniń Tuńǵysh Prezıdenti bolyp saılanǵan edi.

Dáristiń sońynda «Kók týdyń jelbiregeni» áni oryndaldy. Qonaqtarǵa ortalyq dırektory saıası ǵylymdarynyń doktory G.R. Nýrymbetova «Uly dala tulǵalary» ortalyǵy shyǵarǵan kitaptardy syıǵa tartty. 

Tuńǵysh Prezıdent kúnine arnalǵan dáris jastardyń tarıhı tanymyn, qoǵamdyq sanasyn qalyptastyratyndaı dárejede ótti.

 A.K. Begalıeva, R.T. Naralıeva,

 Ál-Farabı atyndaǵy QazUÝ-dyń aǵa oqytýshylary

F.M. Shamshedınova,

Qazaq ulttyq qyzdar ýnıversıtetiiń dosenti