«Habar» arnasy jas jubaılardyń Elorda tórinen baspana alýyna sebepshi boldy

Rýslan men Gúljan ulttyq ádet-ǵuryptar qaıta jandanatyn «Qalamaimyn» baǵdarlamasyna kezdeısoq kelgenderin baıandady. Qazir olar Almatydaǵy jaldamaly páterde turady. Gúljan áleýmettik qyzmetker bolsa, jubaıy kólik júrgizýshisi bolyp qyzmet jasaıdy.

«Men ózim utyp alamyn degen múlde oı bolmady. Árıne, úmit boldy. Biraq, utyp alǵan kezdegi sezimim áli oılasam, kózime jas keledi» - dep atap ótti Gúljan Qajynova.

Gúljanǵa osynda syrǵa salynyp, uzatylý rásimi de telejoba arqyly uıymdastyryldy. Salt dástúrdiń ozyǵyn kórsetip, olar on eki juptyń arasynan sýyrylyp alǵa shyqty.

«Qalamaimyn» jobasy Qazaqstan Respýblıkasynyń Prezıdenti – Qasym-Jomart Kemeluly Toqaevtyń: «Televızııalyq jáne radıo habarlarynyń sapasyn arttyrý qajet. Arzan oıyn-kúlkiden góri, ulttyq ıdeıaǵa qyzmet etetin topyraǵymyzdan tamyr alǵan tól baǵdarlamalardy molaıtý qajet..»,-degen sózderi men usynysyn negizge alady. Jobanyń basty maqsaty – memleket basshysynyń toı-dýmanǵa qatysty úndeýin halyqqa durys jetkizý. Ulttyq qundylyqtardy ulyqtaı otyryp, qazaqy qýanyshty tól dástúr jolymen ótkizý. Daraqylyqtan tyıyp, burmalanǵan salt-sanany túzetý, úlkender men jas býynnyń arasyna dáneker bolý.

«Qalamaimyn» tok-shoýynyń birinshi maýsymynda «Habar» arnasynyń kórermenderine úılený toıy rásimderiniń barlyq erekshelikteri kórsetildi. Realıtı shoýdyń júrgizýshileri - Baýyrjan Ibragımov, Uldana Erqasym baǵdarlamanyń 50 shyǵarylymynda qazirgi zamanǵy otbasylardyń máselelerin talqylady, joba barysynda umytylǵan dástúrler qaıta jańǵyrdy, jańa otbasylar qurylyp, otaý qurýshylar arasynda paıda bolǵan máseleler ashyq sarapqa salynda. Jobada jastarǵa qazaqtyń salt-dástúrleri kórsetilip, ónegeli ósıetter aıtyldy. Baǵdarlamaǵa qoǵam qaıratkerleri, óner adamdary, otbasy ınstıtýttarynan kelgen sarapshylar, ánshiler de qatysyp otyrdy. Páter ıesin qatysýshylardyń ózderi daýys berý arqyly anyqtady.

«Habar» arnasyndaǵy shańyraq kóterýge ýádelesken  ǵashyqtardyń otaý qurýyna sebepshi bolǵan baǵdarlamanyń alda da talaı qyzyqtary óz kórermenin kútýde. Umyt bolyp bara jatqan salt-dástúrdi dáriptep, nanym-senimderdi zamanaýı túrde jańǵyrtyp, efır barysynda eki eldiń qudalasýyna kýá bolatyn «Qalamaimyn» realıtı-shoýynyń jańa maýsymy 16 qarashadan bastap saǵat 17:00-de «Habar» arnasynan jiberip almańyzdar.