Janbolat Aǵadilge birneshe ret pyshaq suǵylǵan

Búgin qaıtys bolǵan azamattyq belsendi Dýlat Aǵadildiń uly Janbolat Aǵadil áldekimderdiń shaqyrýymen 10 qarasha kúni keshki 10-dar shamasynda Nur-Sultan qalasyna Aqmola oblysy Talapker aýylyndaǵy úıinen shyǵyp ketken. Bul týraly Janbolat Aǵadildiń naǵashy atasy Jaqsybaı Qasymhanuly aıtty.

– Biz úıde otyrǵanda 9 jarymdarda Janbolatqa bireýler "zvondap", Janbolat "qazir baram" dep jatty. Kim habarlasty degenimizde, "dos balalar ǵoı" dedi. Artynsha biz jaqyndarymyzdyń úıine qonaqqa kettik. Janbolat úıde qalǵan. Uzamaı shyǵyp ketken bolyp tur ǵoı. Biz qaıtyp kelgende Janbolat úıde bolmady. Ájesi (Gúlbarshyn Jarmuhambetova – red.) habarlasyp kórip edi, telefony sóndirýli eken. Bala ǵoı, joldastarymen júrgen shyǵar dep jatyp qaldyq. Erteńgisin qaraly habardy estidik, – deıdi Janbolattyń naǵashy atasy.

Janbolattyń jaqyndarynyń aıtýynsha, tóbeleske qatysty delingen balalar qazir qamaýda. Olar 15 shaqty adamnyń ustalǵanyn estigen.

Tóbelestiń neden shyqqany, Janbolatty kim pyshaqtaǵany, tergeý barysy týraly ázirge eshteńe bilmeıtinderin jetkizdi.

Tek Dýlat Aǵadildiń inisi Tańat Jalmaǵambetovke Janbolattyń máıitin kórýge ruhsat berilgen. Tańat Jalmaǵambetov Janbolattyń denesinen pyshaq jaraqatynyń izderin kórgenin aıtty.

– Úshinshi jáne tórtinshi qabyrǵalardyń arasynan suǵylǵan pyshaq izin baıqadym. Pyshaqty úsh ret tyqqanǵa uqsaıdy. Denesinde ózge jaraqat izderi bilinbeıdi, – degen ol túndegi oqıǵadan habary joq ekenin atap ótti.

Janbolattyń jaqyndary marqumnyń denesi jáne medısınalyq saraptamanyń aldyn ala qorytyndysy erteń beriletinin, Janbolattyń denesin jer qoınyna tapsyrý jumaǵa josparlanyp otyrǵanyn málim etti.

Resmı oryndar tóbeleske ne túrtki bolǵanyn habarlamady. Nur-Sultan qalasynyń polısııa departamenti tergeý júrip jatqanyn málimdedi.

"10 qarashada saǵat 22.56-da 102 nomerine Nur-Sultan qalasy Kóktal yqshamaýdany Bolashaq kóshesiniń boıynda jappaı tóbelestiń bolǵany týraly habar tústi. Oqıǵa ornyna kelgen polısııa qyzmetkerleri jas jigitter arasynda janjal bolyp, arty tóbeleske ulasqanyn anyqtaǵan. Saldarynan eki adam dene jaraqatyn alǵan. Onyń biri 17 jastaǵy J.Aǵadil aıaǵynan jaralanyp, jedel járdem kóligi kelgenge deıin sol jerde qaıtys boldy.

Atalǵan derek boıynsha Qazaqstan qylmystyq kodeksiniń 99-bap 2-bólimi (adam óltirý) jáne 293-bap 3-bólimi (qylmystyq top jasaǵan, atys qarýyn, gazdy qarýdy, pyshaqtardy, kastetterdi jáne ózge de sýyq qarýdy ne densaýlyqqa zııan keltirý úshin arnaıy laıyqtalǵan basqa da zattardy qoldanyp nemese qoldanýǵa tyrysyp jasalǵan is-áreketter) boıynsha qylmystyq is qozǵaldy.

Qazirgi ýaqytta janjal qatysýshylaryn anyqtaý maqsatynda tergeý júrgizilip jatyr. Ustalǵandar tergelýde. Tergeý nátıjesi boıynsha ár adamnyń áreketine quqyqtyq baǵalaý beriledi. Tergeý jalǵasýda" delingen polısııa departamenti taratqan habarlamada.

Janbolat Aǵadildiń ákesi marqum Dýlat Aǵadil saıası, áleýmettik problemalar men azamattyq quqyqty saqtaý máselesin kóterip júrgen. Ol ótken jyly birneshe márte ákimshilik jazaǵa tartylyp, keminde 60 táýlik qamaýda otyrǵan. 24 aqpanda Aqmola oblysy Selınograd aýdandyq polısııa bóliminiń qyzmetkerleri Talapker aýylyndaǵy úıinen alyp ketken. Artynsha 25 aqpanda belsendiniń tergeý ızolıatorynda qaıtys bolǵany habarlandy. Resmı derekte belsendi júrek talmasynan kóz jumǵany aıtyldy. Alaıda marqumnyń jaqyndary men azamattyq belsendiler munymen kelispeıdi.